名過於實 翠華
翠華嘅嘢食，價錢唔平，勝在質素穩定。簡單到爆嘅餐蛋麵如何？見到真身，有點失望！首先，3 塊餐肉偏薄身，而且很乾，食落似豬肉乾又偏鹹。麵身選用麻油味出前一丁，軟硬尚算適中，但湯頭卻偏鹹，沒有麻油香味。優勝地方係太陽煎雙蛋，蛋黃汁可拌麵。每碗 $42，加埋要等 12 分鐘先有得食，性價比唔算太高。
| 餐肉 | ★（5★為滿分） |
| 雞蛋 | ★★★★半 |
| 即食麵 | ★★★★半 |
| 湯底 | ★★ |
| 價錢 | $42 |
| 總分 | 12/20 |
感覺似煎了一段時間，肉汁被封乾，很鹹。
出前一丁麵，淥得剛好，不會太走樣，但湯頭偏鹹。
翠華餐廳
地址：銅鑼灣謝斐道 483-499 號地舖
電話：2892 2633
價錢與品質相符 太興
餐蛋麵賣相唔錯，起碼午餐肉睇落有光澤，而且有厚度！雖然只有兩塊，但厚度適中（每塊 0.5cm 以上），食得出餐肉應有的軟腍及味道。襯炒蛋，分量較細，但香滑有蛋汁；至於即食麵，同樣選用出前一丁，煮得較為硬身，湯頭極香麻油味，還附加一條菜心，貼心！雖然收費唔平，但品質搭夠了。
| 餐肉 | ★★★★ |
| 雞蛋 | ★★★★ |
| 即食麵 | ★★★ |
| 湯底 | ★★★★ |
| 價錢 | $37 |
| 總分 | 15/20 |
午餐肉厚薄適中，腍滑得來不失咬口。
炒蛋外表睇落有點乾，但食落好滑，而且有蛋汁。
太興餐廳
地址：銅鑼灣謝斐道 470-484 號信諾環球保險中心 1 號地舖
電話：2577 7038
屋企味道 華星冰室
冇諗過華星冰室的餐蛋麵會有如此驚喜！第一眼見到碗麵，心起問號：點解湯底「白_ _」？以為是乜乜豬骨湯，原來即食麵的味粉及麻油畀你自己落，係咪好有屋企 feel 呢？方便大家調校鹹度之餘，更借勢標明，貨真價實是出前一丁。煎蛋方面，有太陽蛋或炒蛋可選擇，點了炒蛋，分量比太興多，而且極香牛油味及充滿蛋汁！最意想不到是午餐肉，睇落乾身，但食落脆口又軟腍，難得夠熱，食得出即煎，十足自己屋企煎一樣！由落單到上枱都只需 7 分鐘，難得價錢比翠華和太與都便宜，性價比極高。
| 餐肉 | ★★★★★ |
| 雞蛋 | ★★★★★ |
| 即食麵 | ★★★ |
| 湯底 | ★★★★ |
| 價錢 | $35 |
| 總分 | 17/20 |
炒蛋極香牛油味，而且蛋汁甚多。
3 塊午餐肉，雖然偏薄，但外脆內軟，食唔停口。
華星冰室
地址：灣仔克街 6 號廣生行大廈地下 B1 號舖
電話：2666 7766
Super Size 餐肉蛋﹗ 北海道牧場餐廳
北海道牧場餐廳的名物是「午餐肉扒」及「牛乳蛋」，餐蛋麵應該不錯吧！餐蛋麵一上，先畀炒蛋及餐肉的 size 嚇親！炒蛋煎成正方形，睇頭十足，香滑度度；午餐肉扒果然有厚度，但味道偏鹹，與番茄湯一齊食，味道先平衡番。餐肉、雞蛋及番茄湯都有一定水準，惟獨麵質有點失望，雖然選用出前一丁，但麵身粗硬，感覺似焗熟多於用明火煮過。整體來說，不過不失。
| 餐肉 | ★★★半 |
| 雞蛋 | ★★★★半 |
| 即食麵 | ★ |
| 湯底 | ★★★半 |
| 價錢 | $40（套餐）轉出前一丁加 $5 |
| 總分 | 12.5/20 |
湯頭尚算鮮甜，番茄味濃。
蛋味濃郁，又夠滑。
Super size 的午餐肉扒，細食嘅話好難 K.O 全份！
北海道牧場餐廳
地址：灣仔莊士敦道 211 號地下 A-B 舖
電話：2575 0733
備註：5*為滿分
文、攝：Theo
歡迎你 like 我哋 U Food Facebook Page / U Food Instagram ，取得我哋更新更快嘅資訊！
