這店由愛雀之人 Peter 所開，他本身是紅酒入口商，後來轉行開餐廳，便想到用自己的愛雀做生招牌，「我同 partner 在家養咗 11 隻鸚鵡，呢兩隻 Eclectus 好嗲好黐人，帶佢嚟鋪頭咪又可以吸引客人又可以見佢地多啲囉。」連店名都以鸚國為名，即是鸚鵡的國度，店內吊燈也特地物色鸚鵡形，遲點仲會在小店內貼滿鸚鵡 poster 呢！
至於食物都是大路的西餐，如燒春雞、燒豬肋骨、意粉等，驚喜的是做得用心有水準，好似豬仔骨，自家用香草醃兩小時再慢煮同烤香，香口軟腍，配埋自家秘製嘅燒汁食夠哂惹味，而燒春雞則堅持不走捷徑先白烚或預先烤好，接到柯打先由生烤至熟，雖需時近半小時，但食落特別皮脆 juicy，值得等待。另一亮點是菜式都好抵食，下午六時前供應的主菜連餐湯及咖啡全部都 $100 有找，性價比極高，雖然位置有點吊腳，鍾意動物的都值得來支持下。
US Roast Spring Chicken $89
一客有半隻烤雞加薯仔及加了蜜糖調味的甘筍，豐富飽肚，雞隻堅持接到柯打才烤，特別皮脆肉嫩。
Baby Back Ribs $90
豬肋骨經過慢煮，軟腍入味，薯菜有齊炸薯角、椰菜沙律、粟米等，夠哂多元化。
Spaghetti Bolognese $79
肉醬由新鮮豬肉自家切碎，不用現成的茄醬而用意大利番茄慢慢熬，食落寧舍鮮香。
Breakfast Ciabatta $48
將成個 All Day Breakfast 如雞蛋、番茄、英式香腸、煙肉等塞哂入一個外脆內軟的意大利包內，非常足料，當午餐食都飽！
Potato & Pea Soup (隨主菜附送)
用上大量的烤薯仔同青豆 blend 成，入口濃稠，豆香濃郁，真材實料。
Espresso (隨主菜附送)
咖啡豆由店子附近的本地烘焙中心炒製，由埃塞俄比亞、印尼等地的咖啡豆自行拼配而成。最有趣的是咖啡店帶點中式舊餐具的style，原來是從中環雜貨店物色的。
呢 2 隻生招牌叫 Jasper (左) 同 Ruby (右)，係隻一歲大的 eclectus 鸚鵡，雖然仲未識講嘢，但係好 friendly 好可愛！
老闆 Peter 是個愛雀之人，除了這兩隻生招牌，屋企仲有多 9 隻鸚鵡！
店子細細，佈置卻有心思，連吊燈都是鸚鵡狀，遲點仲會在牆身貼埋鸚鵡的 poster。
鸚國
地址：葵涌青山公路葵涌段 313 號天際中心地下
電話：6908 6908
營業時間：9am-6pm（晚市時間為6pm-10pm，需預訂）
收費：目前只收現金，晚市前不設加一，晚市設加一
交通：港鐵葵興站 E 出口
泊車：葵星中心 $12/hr
文：Amy、攝：Ki
想睇更多？即上 新餐廳 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
