雖然大韓民族無辣不歡，但 5 款辣麵嘅辣度都有高低之分，小記及幾位嗜辣專員測試過後，都一致認為最好食嘅係「八道 Teumsae Ramyun 超辣拉麵」，辣度高達 8,557 SHU，曾經喺韓國最辣泡麵名單排行第一！食落口覺得好香辣但唔嗆喉，辣味複雜而且持續有變化，最正嘅係麵條爽口彈牙，好有咬口，整體水準平均地高，仲要只係 $8 一包，價錢比一般韓國辣麵平。
食辣麵，湯底亦好緊要，一邊食一邊聞到濃香辣味，先為之過癮。「八道 Teumsae Ramyun 超辣拉麵」的湯底都不錯，不過今次測試中，最香係「不倒翁 Yeul Ramen 熱拉麵」，淥麵時當調味粉一落水不久，成間房即充滿攻鼻嘅辣味，令人好想食！最得意係，麵條入口就發覺無想像中咁辣，麵煙韌度恰到好處。另一香濃之選係「八道海鮮湯麵」，未食前已嗅到中菜小炒王嘅香味，好似入咗大牌檔，呢款麵由韓國一間人龍店的名廚李連福代言，辣麵都強調色香味俱存，聞落夠香，但食落唔太辣。
一口氣試咗 5 款，比較平庸的是「農心 Nongshim 昆布拉麵」，辣味中滲透很重味精味，而麵條本身太粗及太硬，口感極粗糙。見你咁鍾意食辣麵，畀個小小冷知識你，原來 1912 年美國化學家 Wilbur Scoville 曾創出史高維爾辣度單位（Scoville Heat Unit 簡稱 SHU），用來量度不同辣度，0 度 SHU 的有甜椒，最辣的是墨西哥辣椒（Habanero），達 350,000 - 580,000 SHU。下次食辣麵，可留意下標籤上有無提 SHU！
八道 Teumsae Ramyun 超辣拉麵 $8 / 大發韓國食品
賣相平平無奇，但辣度是眾多款辣麵最高的！一邊食一邊感到火辣辣，吃完滿頭大汗！麵條煙韌彈牙。
不倒翁 Yeul Ramen 熱拉麵 $7.6 / 大發韓國食品
辣度亦偏高， 湯底味道超香濃，一邊淥麵一邊聞到辣味，流晒口水！食落麵條有彈性，夠鬈曲好掛湯。
農心 Nongshim 昆布拉麵 $9 / SHINE KOREA SUPERMARKET
5 款中個性最不突出，辣度中等，但麵條太粗太硬，兼重味精。值得讚賞是有昆布點綴。
三陽辣烤雞麵 $18 / 大發韓國食品
湯底似韓國年糕醬汁，紅卜卜兼辣中帶甜。食第一口不覺太辣，但第二口就覺得辣勁攻上來，久久不散。
八道海鮮湯麵 $17 / SHINE KOREA SUPERMARKET
辣度低，麵條也不突出，但湯底不俗，味道濃濃的很複雜。有韓國名廚李連福代言，包裝即時搶鏡！
大發韓國食品
地址：尖沙咀金巴利道 73 號新業廣商業大廈地下 A 舖
電話：2721 2288
SHINE KOREA SUPERMARKET
地址：尖沙咀柯士甸道 17 號豐樂大廈地下 2 號舖
電話：從缺
文：Celia、攝：Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
