街坊話，龍門居巴士總站旁有一條小街，有超過 10 間宵夜舖，街頭小食齊集，咖喱韭菜豬紅魚蛋燒雞翼狗仔粉炸雞扒碗仔翅生滾粥格仔餅酸辣粉煎釀三寶鹽焗雞糖水……幾乎想食（口既）都有，要一次過掃晒全部，真係要 10 個胃先搞得掂。
當中以台式小食店「5℃」的芝心大雞扒最令人難忘，雞扒的炸粉勁薄，同雞皮一齊炸到脆卜卜，一咬落去芝士爆曬出嚟，好邪惡！店內另一人氣小食係自選配料同醬汁嘅手抓餅，單係配料有成 22 種，認真誇張。
「5℃」芝心大雞扒 $28
「5℃」即叫即整手抓餅 (芝麻八爪魚仔 + 咖哩醬) $28
另有一間叫「師傅仔小食」，佢嘅香蒜白酒炒蜆最有驚喜，夠香之餘白酒味亦突出，有餐廳級水準，而其他小食如炸薯條配芝士汁及炸雞軟骨亦是必食之選。
「師傅仔小食」(上) 蒜香雞軟骨 $28、(左) 香蒜白酒炒蜆 $29、(右) 炸薯條配芝士汁 $25
食完一餐好口渴，可以去「摩登士丹里」，店主極力推介的魔豆菠蘿冰同細路仔鴛鴦，前者酸甜有果肉有爆珠，可以消滯，後者係阿華田溝好立克。如果你係榴槤癡，呢度亦有一款 D24 榴槤王煎餅，即叫即煎熱辣辣，而且啖啖榴槤肉，大滿足。
「摩登士丹里」(後左) 魔豆菠蘿冰 $24、(右) 細路仔鴛鴦 $16、(前) D24榴槤王煎餅 $39
「香港街頭小食風味」豬紅韭菜什錦 $35
雖然多嘢食可以慢慢揀，但溫馨提示一句，由於附近冇車位，要揸車嚟開餐嘅人最好先泊喺附近停車場再行過嚟搵食，經常有警察嚟抄牌的。
[INFO]
地址：龍門居巴士總站旁
營業時間：晚上 6 點後
文：Froggie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
