呢度成間 forrest cafe 咁，入到嚟，真係聞到花香同草味，呢度不是首爾弘大呀，係登登登凳登龍街，靚死人囉，環境我畀 10,000 分，yeah yeah yeah！
我聽過人哋話前世賣花，今世就會做靚人，呢間用花做主題嘅 cafe，老闆娘 Jenice 簡直就係呢個傳聞嘅肉體證據，佢又瘦又 fit，又生得標致過人，上天仲好唔公平，畀埋對巧手佢，大家睇下左下角，嗰啲唔係盆栽嚟，啲花花用白豆蓉唧出嚟，啲花瓣超細緻，下面係 cupcake，100% eatable，不過靚到好似 real real flower 咁，你叫我點捨得咬落去喎？selfie selfie selfie 先。
全宇宙，老闆娘最知少女心，fit 爆又鍾意花花嘅 Jenice，專登返老家韓國學呢種唧花技術，出面唔係無花花 cupcake，不過啲花係甜到牙都痺嘅 icing sugar 或肥過 BJ 嘅 butter cream，好睇唔好吃。而呢種韓式唧花 cupcake 就用咗白豆蓉取代，唧出嘅花形超靚又耐放，食落有少少甜同豆蓉味；Walk-in 嘅又可點抹茶蛋糕，上頭一樣有豆蓉唧花，蛋糕用米粉做，唔係肥嘢，一次過滿足少女為食、怕肥、愛靚、selfie 幾萬個願望，真係好鬼貼心。
開心皇道係食埋先減，我仲試咗佢哋一系列韓式甜品，最冧冧係由傳統韓國街頭煎餅（hotteok）改良出嚟的 pancake，本來以為好肥膩，但加咗紅莓，煎到脆脆地又酸酸甜甜，煙煙韌韌，超 like；仲有嗰個蠱惑的棉花糖多士，裏面居然加咗塊糯米年糕，好似日本 mochi 咁，煙煙韌，實不相瞞，成分畀我幹掉咗，好飽。
飽飽係唔使怕嘅，飲埋老闆娘喺韓國運來嘅花茶，茶味酸酸甜甜咁，一陣就消滯，咁我又可以 reboot 個胃，繼續食爆佢啦。
Flori flower & Korean dessert café
地址：銅鑼灣登龍街 31-35 號玉山大廈地下及 1 樓
電話：2327 8113
營業時間：12nn-12mn
想睇更多？即上 銅鑼灣 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
