姚文定，係佐敦醉瓊樓太子爺，行年 48 歲，童年在橫頭磡七層大廈、馬仔坑村木屋㗳盡老香港嘅街頭小食，正宗油渣麵咩味，佢梗係識。原來佢背後仲有豬油渣麵高人指點，她就是賢內助姚太，原來姚太小時候跟媽媽在東頭邨推車仔賣豬紅蘿蔔油渣麵，嗰朕老香港味，到而家兩公婆都記得。
豬油渣跟足前人做法，真係狠狠地下鍋炸。油渣麵之所以咁香，咪就係要盡情逼出豬油香，或炸或灼都係偷雞做法，姚生唔 buy。做豬油渣，姚生不敢怠慢，豬油膏係下欄，怕交貨回來，肉枱求其交啲唔夠肥嘅貨盞嘥氣，於是把心一橫朝朝去慈雲山街巿肉枱買貨，全隻豬最肥係豬腩、豬背位置，所以姚生指定豬油膏要這部位，唔夠肥嘅豬腳位置一概不收，堅持豬油膏要 9 分肥、 1 分瘦，他還特地要求肉枱師傅切豬油膏時留點瘦肉，買下欄貨都咁鬼多要求，姚生自言開舖初期，吃過肉枱不少閉門羮。
搵貨源都咁煩，炸更攞膽，要做返舊時嗰種金黃蓬鬆口感似脆米果嘅豬油渣，要逼晒啲豬油出嚟，要足足 20 分鐘才行，期間用文火用武火都要靠桃姚生實，工夫錢都唔少。而且大家咪以為豬油膏係下欄，實情佢一炸油份就會走，即時縮細 1 倍，炸 1 斤先做夠 3 碗麵用嘅豬油渣，睇睇每碗有咁多豬油渣，姚生日日炸到手軟都因為咁咋。
滷水豬肚絲 加 $9
豬肚絲腍滑好"O趙"，滷水香滲到入肚身。
滷水豬耳 加 $9
豬耳爽口，脆骨好"O趙"。
滷水雞翼尖 加 $9
雞翼尖炆到膠製出晒嚟，吃多幾隻，嘴唇會有黏黏感。
招牌油渣麵 $30
傳統的豬油渣麵，用炆蘿蔔水來做湯底，姚生跟到足，不過蘿蔔同冬菇分開炆，味道超足，將豬油渣加到熱辣辣的湯裏，油渣遇熱，油香豬香即時散發，麵條用上海粗麵，麵粉感十足兼滑，偏腍滑但不失煙韌的頭，也索到蘿蔔湯味，添點辣菜甫，成碗麵更加香。
秘製辣醬魷魚 $17
辣醬魷魚炒得惹味香口，魷魚多肉，沒有「乸」到收縮晒和有怪味。
四拼 $27
包括豬紅、韭菜、蘿蔔及豬腸，豬腸都是店裏招牌。
老三油渣麵王
地址：土瓜灣新山道 4 號長城大廈地下 1A 舖
電話：6736 2623
營業時間：12nn-10:30pm，星期日休息
收費：只收現金，不設加一
交通：於旺角先達廣場乘 28M 小巴，於欣榮花園下車，步行 3 分鐘
泊車：門外可泊車
平均消費：$40
備註：初一至初七（8/2 - 14/2）休息，初八（15/2）啟巿
相關報導：
牛下牛雜檔 再現江湖
承傳三代 榮耀米芝蓮滷味
觀塘友 集體回憶嗱喳麵
歡迎你 like 我哋 U Food Facebook Page / U Food Instagram ，取得我哋更新更快嘅資訊！
