2 個多月前，發生咗一件令唔少香港仔興奮嘅飲食大件事，就係《米芝蓮指南》居然挑了 23 間街頭小食店成為「車軚人」推介，其中一間是這間本來名不經轉的滷味店，做滷味做到被米芝蓮加冕，仲唔係老香港小食之光。
舖名叫「第三代肥仔」，連招牌字款設計都同旺角人氣滷味店「肥姐小食店」99.9% 相似，乜料先？唔係山寨照抄叼人光咁厚顏呀？呢間舖相當有嫌疑。但原來這店老闆余啟康，珍珠都無咁真係旺角肥姐嘅親生仔，年多前決定自立門戶，用盡積累，跟媽媽一樣用外公的配方做滷味，成為此方第三代傳人。
這店以「第三代」掛帥，不說不知，原來余啟康媽媽肥姐是第二代，發明「肥」字頭滷味配方嘅第一代掌門其實是肥姐爸爸，即是阿康嘅外公。數十年前，外公已在弼街擺街邊檔，70 年代女兒肥姐推着木頭車在金聲戲院、女人街游走，最終在金聲戲院成名，身為孻仔嘅阿康，10 多歲已到街邊幫忙，一早承繼了外公嘅滷水秘方。
唔好以為做仔嘅，只是將母親那套複製過來便算，其實阿康有不少自家諗頭，好像幫母親滷了多年嘅、發夢都背得出嘅滷味 recipe，不是一味照做就算，反覆試過多次，特意減輕了滷水濃味度兼加強了香料清香，滷出自家口味。阿康說「肥」字頭嘅滷味，無乜秘方，用料跟坊間差不多，只不過是香料質素之別，所以要特意向上海街一間香料老號拿貨。
滷味也要講「新鮮」，滷生腸墨魚豬心雞腳嘅工夫，阿康不放心交給人，寧願每朝一早 9am 回舖自己處理，朝朝用足 30-60 分鐘洗生腸與內臟，不許內臟處理不周影響滷味味，滷水也日日用新鮮香料煲，再逐樣內臟放到煲內「烚貨」逼入滷水香。他說：「滷味唔留過夜，日日賣晒日日清，咁啲滷味先夠鮮香，隔咗晚放雪櫃，一朕雪味、肉又會變硬，做壞招牌。」
大皇牌套餐 $31 份
包括火雞腎、大墨魚、大生腸（左起），火雞腎最入味，鹹香又爽到「嗦嗦」聲，無渣兼唔會過硬；墨魚厚肉但仍腍滑，唔會咬極都唔斷；大生腸挺身光令，賣相一流，腸套層層叠裏面有脂肪，入口無罯味、餲味，好好"0趙"又甘香。
細生腸 $7 串
跟大生腸不同，這個只有單層腸套，入口腍腍滑滑，(0趙)起來有少少煙韌感，滷水味逼晒入去。
豬脷 $7 串
沒有加紅橙粉，保留原色，豬脷爽爽，滷水芳香。
豬心 $7 串
坊間滷味檔少做豬心，肥姐旺角店有做，阿康也把做這味，豬心滷過後唔腥，吃來有點軟腍腍咁。
豬頭肉 $7 串
豬頭肉清得乾淨，無嚇人的毛髮，滷得甚為入味，少咗平日吃豬頭肉的油膩感。
紅腸 $7 串
紅腸軟腍多了滷水香，吃到不停得口。
豬耳 $7 串
豬耳爽到嗦嗦聲，滷味不算太濃，但不自覺愈吃愈多。
豬膶 $7 串
超正，厚肉唔會煮過到又嚡又硬，起沙好味，吸晒滷水鹹香味，夾埋腍滑的豬頭肉吃，是阿康推介的食法。
大生腸 $12 串
大生腸裏面有腸脂，但沒有罯味，腸皮多層好好0趙，滷味逼晒入腸裏。
大墨魚 $12 串
墨魚厚肉，但灼熟程度拿捏得好，軟腍易咬，吃來有墨魚鮮甜，有少少滷味香吊味，口味算是眾滷味中最清新的。
第三代肥仔小食店
地址：尖沙咀厚福街 3 號華博商業大厦 G1 地舖
電話：6255 3872
營業時間：1pm - 12mn
收費：只收現金，不設加一
交通：港鐡尖沙咀站 B 出口，步行 3 分鐘
泊車：金馬倫里設咪錶位
平均消費：$20
相關報導：
牛下牛雜檔 再現江湖
歡迎你 like 我哋 U Food Facebook Page / U Food Instagram ，取得我哋更新更快嘅資訊！
