今期我有好推介，係呢間小小曲奇店。呢間舖，贏口碑，因為佢開業初期，都未有雜誌推介，已經口耳相傳：灣仔有間好味曲奇店，啲曲奇又脆又鬆，牛油香適中又唔會勁甜，正正咁話喎。我咁鍾意食曲奇，老虎蟹都要試下。今回啲為食網民真係無呃人喎，啲曲奇真係好有牛油香味，唔錯唔錯。
原來，舖頭背後有猛人主理──一位係金子全師傅，另一位就係黃錦興師傅。佢哋真係老行尊嚟，金師傅今年 70 歲啦，60 年代入半島酒店做學徒，仲叻到做埋半島第一個華人西餅總廚，本來退咗休啦；黃師傅都勁㗎，佢同金師傅係師兄弟，後尾仲做埋文華東方酒店行政總廚，佢仲幫鄧小平同志整過甜品，兩個叻人整曲奇，加埋前喜來登酒店餅廚萬師傅一齊做，簡直係易如反掌啦，唔好食都難囉。
放塊曲奇餅入口你就知呢度嘅用料無呃神騙鬼，最 impress 我嘅唔係花臣多多嘅口味，反而係最簡單嘅海鹽牛油味，食落有牛油香，有少少鹽香味吊起牛油味，真係食一塊就停唔到口。咁正，都係因為牛油、麵粉用得靚，牛油有法國同澳洲兩種，加埋美國有機蛋同小麥、太古有機蔗糖同天然乾果仁，仲用埋法國「鹽之花」（Fleur de sel de Guerande）調味，牌面都贏啦。
乾果味嘅曲奇我都 like like，因為係天然製作，曲奇裏面啲乾果有自然果香，最正係鳯梨同芒果，兩款原材料都係嚟自台灣，前者係寶島果王愛文芒、後者係好出名嘅關廟鳯梨，配埋滿有牛油香嘅曲奇餅，唔錯。
朱古力系嘅曲奇餅都好正，全部都用咗 Valrhona 可可粉同 50% Cacao Berry 朱古力粒製，朱古力味有陣甘香，唔會死甜，加埋橙粒嗰款係我最 like like 嘅。
曲奇童話
地址：灣仔盧押道 7-9 號澳洲大廈地下 B4 舖
電話：2898 1499
營業時間：11:30am - 8pm
備註：尖沙咀堪富利士道亦設分店
想睇更多？即上 灣仔 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
