平日入到餐廳，我會第一時間攞餐牌仔細研究，再快快脆點菜，期望快快趣有得食，但嚟到呢度就好唔同，我好鍾意呢度嘅環境，無豪華裝修，但做到撲實素靜，仲有啲京都 feel，不知不覺令我哋啲心急人放輕鬆，節奏會即刻慢落嚟，仲會不期然收細音量，真心欣賞老闆設計嘅用心。
其實呢間舖嘅本店係石山，一間在銅鑼灣商廈有 25 年歷史嘅低調日本料理，老闆 Joe 及 Jessie 見有唔少熟客都會點素食，他們近年又開始食素，於是就認認真真搞起素食餐廳來。
同 Joe 及 Jessie 傾開偈，發現原來做日本素食不是易事，唔係飛甩晒肉食就做到，因為日本料理好靠木魚湯入味，用普通的蔬菜湯代替，食物味道又會好淡，二人跟師傅研究咗好耐才搵得啱蔬菜湯代替木魚湯嘅秘方，就算唔用蛋唔用奶，呢度嘅素食都夠味，無坊間素食淡荗荗、引唔起人食慾嘅弊病，G‧O‧O‧D 呀！
呢度仲樣好，就係只有兩個套餐，等我唔使心多多左諗右諗。款款嘢食都係好嘢嚟㗎，燒 BB 粟米嗰道菜係我最有印象，北海道粟米心超甜超脆，旁邊塊腐皮燒過之後，超脆，配甜甜哋嘅醬汁，直頭停唔到口；壽司都係亮點，見唔見我夾起嗰嚿壽司，唔係吞拿魚嚟，係日本番茄仔，超甜，仲有好新鮮嘅海葡萄。仲有用京都空運過嚟嘅豆漿做嘅茶碗蒸，滑溜有濃郁豆味；雜菜煮個蘿蔔好入味，裏面仲有矜貴健康的黑蒜；胡麻豆腐我好欣賞，好重芝麻味，好鬼香！好勁，咁多道菜我居然係吃光光，無剩食超環保喎。
或者你會問，呢度嘅分量食唔食得飽㗎？我可以答你，以我嘅食量，係飽飽嘅，男士可能會覺得七、八成飽，但健康嘅皇道咪就係咁之嘛？香港人，咪成日大食大咗個胃先得㗎！
重點推介：「夏日清爽晚餐」 特價 $338 位（另配超甜日本番茄或梅酒番茄、燒紫薯年糕、懷石一品）
居素屋日本野菜料理
地址：灣仔灣仔道 83 號 9 樓
電話：5500 8812
營業時間：星期一至六 12nn-3pm，6pm - 11pm，星期日休息（初一及十五除外，只限供應晚市）
備註：
1. 另有「廚師發辦」套餐，約 10 道菜，特價 $300 位。
2. 另加一服務費
想睇更多？即上 灣仔 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
