舖頭的第一個試店在屯門，約可坐 30 人，但開業第一日已經常滿，幾乎每小時都坐滿人，似乎水準都不錯。
嚟到唔食唔得嘅，一定係超抵吃嘅燕窩點心，現今韓風大流行，師傅就利用韓式甜品愛用嘅蜂巢來做蛋撻，還好矜貴地加埋燕窩，連撻底都係秘製，結合了葡撻的香口、但又有少少酥皮底嘅鬆化，最緊要係賣 $8 個，堂食同外賣都得㗎，好抵玩喎；燕窩甜品仲有一款碗仔素翅，一樣加咗一小匙燕窩，賣價貴小食檔的小小，都幾食得過。舖頭裝修年輕化，擺明想吸引年輕人幫襯，所以推出了一系列啱晒後生仔嘅相機先吃造型點心，好像呢期相當流行嘅豬仔包、冬菇包、鑊仔生煎包，新派的又有小漢堡及鱸魚腸粉等。
跟普通點心專門店最大分別仲有，這裏有外賣甜品專櫃，由造型似足雪條嘅綠茶意式咖啡蛋糕拼香橙慕絲，到牛油曲奇、蜂蜜提子麵包、果仁蘋果批及鮑魚雞批及蜂巢燕窩蛋撻也在這專櫃買到，概念夠新。
特別推介：
瑪莉蜂巢燕窩蛋撻 $8 個
蛋撻皮介乎葡撻與酥皮之間，鬆化但唔硬，蛋漿裏已混入蜂巢及燕窩，蜜味甜甜的。
奶黃小豬包 $18 籠
奶黃包變咗做豬仔造型，可愛到不得了。
燕窩雞絲碗仔素翅 $26 盅
素翅裏也加了一小匙的燕窩，令土炮嘅地道小食變矜貴了。
真係冬菇包 $18 籠
冬菇包裏是炒過的冬姑粒與雞髀菇粒，屬素食，造型可愛。
香葱胡椒包 $18 鍋
包子十分足料，裏面有胡椒香十足的肉餡，鑊仔上，熱辣辣，另有一款燒牛肉口味。
XO 醬鱸魚扒腸粉 $24 碟
鱸魚煎得皮脆肉滑，上面仲有 XO 醬，腸粉即叫即製，米香不錯。
黑蔗糖寒天棗蓉蛋糕 $13 件(約 50g) $32 原條(約 150g)
口感有點像馬拉糕，有少許濕潤感覺，不過滿有蔗糖香及棗香，一件都幾飽肚，是店內的 best seller。
鮮製炭燒咖啡、鮮製香濃奶茶 各 $18 枝
太興的咖啡及奶茶相當馳名，於是店裏索性供應樽裝的。
點心瑪莉
地址：屯門屯隆街 3 號屯門市廣場 2 期地下 17-18 號舖
電話：2477 9233
營業時間：7:30am-10:30pm
收費：暫只收現金，不設加一
歡迎你 like 我哋 U Food Facebook Page / U Food Instagram ，取得我哋更新更快嘅資訊！
