但估唔到在有少少吊腳嘅青衣長發邨，居然有我哋港人渴望已久嘅平民小食街，最貼心係 24 小時營業，無論係返 9 至 5 嘅斯文上班族或是輪班夜歸人，甚至係夜一夜都唔願瞓嘅典型港人，幾點都有小食等緊你，2015 最偉大嘅發現就係呢條街啦。
寶島夜巿 八度半
到美食城一定要幫襯呢檔，雖然檔口細細，但有唔少即製台式美食，最多人幫襯就是即叫即炸嘅鹽酥雞扒，雞扒跟足台北夜巿般，大小跟人臉相若，由於甚具份量，柯打時不要怕等一會。手抓餅都不俗，餅底的酥皮夠脆夠鬆化，即叫即煎，小心辣親嘴仔。食完仲可以柯打杯消暑解熱氣的冬瓜茶。
芝士香腸手抓餅 $20
酥皮的麵糰在鐡板壓扁煎香，熱辣辣又熨嘴，餅底酥脆，加上半融的芝士及沙律醬，好有台式風味。
鹽酥雞扒(大) $27
雞扒甚有份量，炸粉都叫上得適中，不會如外間般吃來只有一口粉，吃來香辛味甚濃，屬香口之選。
冬瓜黑糖霜 $15
味道偏甜，不過用來消膩解辣又 OK。
心多多 煎釀三寶檔
愛吃香口嘢嘅朋友，不妨來幫襯呢檔。這檔口全天候炮製煎釀三寶，釀青椒、釀豆腐、炸魚蛋當然有，最特別是有超級 old school 嘅炸雲吞及炸韭菜餃，這檔口的收費是以件計算的，雖謂「三寶」，但一次過試勻都得，等巴士時叫一份消磨時間最啱數。
煎釀三寶 $7/3件、$14/6件
食客可在多款炸物中自選件數，一次過揀晒咁多款得。最特別是有炸雲吞及炸韭菜餃，大路的炸青椒、蟹柳、魚肉豆腐、紅腸魚肉及魚蛋都有。
入黑 人龍串燒檔
美食城其中一個獨特嘅生態是早晚營運嘅檔口不一樣，早上中午幫襯過，夜晚換咗第二款小食，又可再幫襯過。好像這間只在早上賣潮洲滷味，八九點後才變身串燒檔，人氣超旺，差不多開舖已有街坊等候，雖然舖頭小小，但賣嘅食物跟設堂座的港式串燒店一樣，由大大隻嘅扇貝、大隻蠔及海鰻都有，價錢仲好平民，難怪經常排長龍。
燒菠蘿 $7/串
燒雞翼 $9/串
蒜蓉粉絲帶子 $9/隻
街坊心水 食夜粥
這間一品粥都會早晚變裝唔同樣，早上及中午時段主要賣滷雞髀、滷蛋、鹽水雞腳等滷水小食，仲有兩餸飯，但一到晚上就變成街坊嘅宵夜佳品——即叫即滾生滾粥，而且款式相當不俗，富貴嘅鮑魚雞粥才賣 $24，大路嘅廣東粥品如艇仔鯭、豬膶、魚片粥都有，半夜肚餓又唔想食咁多咩？嚟滾一滾佢啦。
鮑魚雞粥 $24
人龍 伯伯雞蛋仔
咁多檔口中，以這檔最低調，但人氣度絕對唔低。檔口由伯伯主理，蛋漿由他一手包辦，有蛋香有奶香，烘好的雞蛋仔脆度甚佳，水準不比北角連鎖名店低。
雞蛋仔 $10/底
晚間 出沒之甜頭
一樣入夜後才出現的糖水檔，招牌是芒果楊枝甘露及芒果西米露，也有珍多冰涼粉、腐竹蛋、紅豆沙等，不過兩大招牌 11pm 過後經常售罄，想吃食完晚飯就要快啲嚟。
芒果楊枝金露 $17
青衣美食城
地址：青衣長發邨長發商場 101-105、138-142 號
營業時間：24 小時營業
- 所有檔口收費都中央處理，食客先到收銀處買票再拿到檔口取食物。
- 香港唯一一個合法兼 24 小時營業的美食街，新聞紙一報道，好多駕車人士半夜都會特登嚟，24 小時都咁旺。
(原文摘自 U Magazine ISSUE 499)
歡迎你 like 我哋 U Food Facebook Page / U Food Instagram ，取得我哋更新更快嘅資訊！
