全港唯一 「一蘭屋台」
全球第六間嘅「一蘭屋台」登場！一蘭尖沙咀店引入嘅「一蘭屋台」，即仿照日本福岡傳統小食路邊攤設計，可以話係乾淨版「大排檔」，搵埋三五知己嚟食個拉麵、飲杯嘢就最開心喇。而四周則貼上日本福岡唔同年代嘅相片、海報之外，更有一啲日本 gag 仔作裝飾。雖然寫日文，應該只有日本人以及學日文嘅人先會明，但係整個充滿日本古老、經典嘅和式風味都已經加晒分。
味集中 Counter X 一蘭屋台
身為全球最大嘅一蘭店，一蘭尖沙咀將整間店舖分為兩 part：味集中 Coutner 以及一蘭屋台。新店擁有「一蘭屋台」，令客人同朋友們唔洗「一支公」食拉麵，可以邊食嘢邊吹水。除此之外，新店同銅鑼灣店一樣，會保留充滿一蘭特色嘅味集中 Counter，等客人可以「自己食嘢又得，同 friend 一齊開心食亦得」！
限定！三大必食 items！
嚟到尖沙咀一蘭，一定要試「一蘭屋台」限定嘅「釜醬汁燒豚肉」(HK$59)！用上由日本直送嘅原材料炮製而成嘅釜醬汁，以及超濃肉味嘅豚肉、爽脆嘅白葱，口感爽脆之餘又感受肉汁嘅鮮甜，勁 juicy！一蘭嘅店員仲會教你「獨特的進食方法」：先將幾塊白葱放上豚肉上面，再灑上一蘭特製、帶點辛辣嘅「赤胡椒」，再放入口，呢個食法會令味道層次更為提升！
* 只限尖沙咀分店內一蘭屋台供應
第二樣必試嘅就係香港限定嘅「日本清酒」(時價)，一蘭會按時令推出相應嘅酒品，而小編今日試嘅日本清酒來自日本福岡縣嘅「饗」，日文發音同日文嘅「待人之道」發音相同，夠晒 special。但係最爆嘅亮點就係：店員會喺客人面前將清酒斟到瀉，唔係唔小心，係「有心」刻意地斟瀉，一蘭負責人解話，「斟瀉酒」代表一蘭對待客人嘅心意，一樣係滿到瀉出嚟，嘩嘩嘩，呢句如果係自己嘅男/女朋友對自己講，應該都會幸福到滿瀉。
* 只限尖沙咀分店內一蘭屋台供應
之後必試 item 嘅仲有香港限定嘅「蘭茶」(HK$39)，為一蘭自家研製，可能茶葉混合咗南非、日本、中國等地，味道同一般飲開嘅茶唔同，帶有淡淡甘香，覺得一蘭拉麵嘅湯底太濃郁，可以飲番杯「蘭茶」過渡下，更有消熱、調整腸胃嘅功效。
***溫馨提示：一蘭尖沙咀新店聽日開幕，早啲去排隊潮聖啦，一蘭會送上限定嘅「一蘭原創筷子」俾客人，送完即止！不過建議客人們要潮聖，就喺店舖門口打定卡先，事關落到地庫，電話訊號完全接收唔到***
文/Joyce
天然豚骨拉麵專門店一蘭
地址：尖沙咀棉登徑 8 號地庫
電話：2369-4218
營業時間：24 小時營業
想睇更多？即上 新餐廳 / 尖沙咀 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
