JW 咖啡室嘅總廚 Tony Wong 有 25 年經驗，曾帶領餐廳奪得多個大獎。裝修前嘅萬豪咖啡室好睇重龍蝦、海鮮等，改裝後嘅 JW 咖啡室喺自助晚餐方面就多以「熱盤」為主打，全部用上鮑魚、海參、花膠等名貴食材，真係夠晒特別，即睇有乜必食先！
鮑魚
鮑魚產地來自南非，每日用飛機新鮮運到香港之後即刻「拆鮑」，拆走鮑魚嘅喉嚨位，防止鮑魚變得苦澀，每日大概要拆成 40 公斤嘅鮑魚，犀利！總廚 Tony 個做法就係鮑魚扒冬菇，小編食落覺得鮑魚好充滿鮮味，因為鮑魚吸收晒 Tony 秘製嘅鮑魚汁，而且肉質夠彈牙，唔硬唔軟，正！
紅燒海參
整過海參嘅人都知，處理海參要需時不少、好巧功夫，又要將海參浸發，又要剪開海參，清理海參嘅內臟、廢物，而且想要海參彈牙、夠腍而唔會過腍，好似爛到一堆嘢咁，其實真係好難。今次 Tony 用上雞湯、燒肉、雞、薑做 sauce，去煮海參。唔講味道如何，賣相已經夠讚！Tony 話佢地會原條海參上菜，唔會將海參再切粒，夠晒派頭啦，影相「呃like」又得！
葡汁焗釀蟹蓋
將罐裝蟹柳、蟹肉、洋葱、蘑菇、牛油、花生醬、咖哩醬等材料拌勻，再將材料釀入蟹蓋中，然後沾少少蛋漿、喺蟹蓋上面加少少芝士，放入焗爐就完成。食落嘅口感層次真係非常豐富，花生醬以及咖哩醬嘅衝擊，仲有洋葱嘅微微辛辣，更有蟹肉嘅鮮味。
其他必試 items：花膠配草菇、龍蝦伊麵、龍躉等。
而自助午餐就以上海小食為主題，有滬式燻黃魚、醋汁海蜇、上海烤麩、口水雞等上海經典菜式。
雖然有固定自助餐菜式，但每年都會有 5-6 次唔同嘅主題，增加新鮮感。而六月份嘅自助餐主題，JW 咖啡室已公佈會做「皇帝蟹」主題，除咗會有大眾熱愛嘅阿拉斯加皇帝蟹腳之外，最值得期待嘅就係 JW 咖啡室特別引進俄羅斯皇帝蟹，算係少見嘅皇帝蟹產地，好期待呀！！
全新嘅 JW 咖啡室將於五月頭開放，想食嘅人要留意下喇！
JW 咖啡室 (前名：萬豪咖啡室)
地址：金鐘金鐘道 88 號太古廣場香港JW萬豪酒店 5 樓
電話：2810-8366
自助早餐 6am-11am
價錢：星期一至日 成人 HK$298/位、小童 HK$178/位
自助午餐 12nn-2:30pm
價錢：星期一至五 成人 HK$388/位、小童 HK$268/位
星期六、日及公眾假期 成人 HK$478/位、小童 HK$328/位
下午茶自助餐 3:15pm-5pm
價錢：星期六、日及公眾假期 成人 HK$308/位、小童 HK$208/位
自助晚餐 6pm-10pm
價錢：星期一至四 成人 HK$618/位、小童 HK$398/位
星期五至日及公眾假期 成人 HK$688/位、小童 HK$488/位
想睇更多？即上 自助餐 特集！
