我諗講到呢度，大家會諗起畀人話「佔路」嘅太平街小小茶店 teakha，今個星期我就嚟到呢度歎茶，實地感受下。
太平山街好難得，清一色矮矮嘅舊樓，無屏風樓，環境寧靜悠間，絕對係香港 hidden gem， teakha 的老闆 Nana 就係鍾意呢種氛圍所以喺度開店，舖頭唔賣咖啡只賣茶，喺商業味咁濃重嘅社會，直頭有少少超現實，不過點解唔得？這小茶室 Nana 好努力經營，堂堂靚女律師身水身汗去茶記學沖絲襪奶茶，鍾意手造的東西，茶具食具遠至京都托運回來，愛茶的她還落力推介純種茶葉，親身去台灣斯里蘭卡印度搵靚茶葉回來，還有每日親手造些樸素的糕點，小情小趣好台灣，但估唔到喺香港搵到。
Nana 知我鍾意飲 Earl Grey，當日就叫我試下「紅玉」，因為呢款紅茶同 Earl Grey 有啲似，人人都知台灣烏龍靚，但原來日治時候日本人喺台灣種紅茶，寶島紅茶少人講，但水準其實好好，「紅玉」就係佢喺台灣南投搵返嚟，Earl Grey 係加咗佛手柑精油嘅茶葉，而「紅玉」係加咗佛手柑皮，佛手柑味超香；仲有一種叫「祈門」嘅中國紅茶，以前好少人講，因為幾乎都攞去出口，英女王其中一款御用嘅紅茶就係用呢種茶混合出嚟，皇室品味，Nana 用佢嚟配桂花黑糖，有少少 Latte 感覺。
嚟呢度，唔能唔吃蘇絲黃譽為「全港 No.1」嘅 scone，今期就用咗柿子製，scone 裏面有柿肉，至於個人「飛佛」就係佢哋嘅「金桔杏仁無麩蛋糕」，no flour 蛋糕我係第一次試，好有杏香，質地似中式清蛋糕，簡單又美味。
喺呢度歎茶，1 小時、2 小時係舒舒服服咁過，而家咪好興講「還我生活」嘅，我好 enjoy 呢種「慢 Beat」喎，有人覺得茶香係小事，公共空間又係小事，但我想講香港多幾間呢啲 cafe，香港人真係可以散下心，好想多幾個 Nana 為我哋努力做好這些最重要的小事，teakha 加油啊！
茶．家
地址：上環蘇豪太平山街 18 號 B 舖
電話：2858-9185
營業時間：星期二至五 11am - 7pm、星期六至日 9am - 7pm，星期一休息
(原文摘自《U Magazine》ISSUE 481、文：小儀、圖：Kam)
