酒吧可玩西式、日式，但走中式路線卻真係少見。銅鑼灣最近開了間樓上酒吧，大玩六七十年代老上海主題，概念是由老闆之一 Echo 所構思，再由另一老闆 Eric 負責落實布置。
全間酒吧的梳化椅都是特別訂造，大大張，坐得舒服自在，而室內的七彩窗花、懷舊彩磚地板，都為酒吧增添了幾分六七十年代的感覺。老闆又專程在內地搜羅了一些古董做裝飾，襯托埋昏黃的燈光，十足十花樣年華的場景。
雖然裝潢是中國風，但酒和食物卻很國際化。酒就有日本酒、whisky、wine、中國酒等，中、西、日酒都有齊，最有 gimmick 都是這裡的cocktail，用店名命名的「Qi Zhong Tian」signature cocktail，就有 7 個演譯，7 種顏色各有不同味道、特色，唔好低估這 7 杯 cocktail 的內涵，有些一聞，酒味超啃，聽聞大部分客人飲三杯就開始醉。
如果不勝酒量的話，客人可以同 bar tender 先講個人偏向的口味，無論酸甜苦辣，他都會為你調出最啱心水的 cocktail，超貼心！食物選擇不算多，主要以串燒為主，都用上靚食材炮製，如日本 A4 和牛、鹿兒島黑豚肉，又會在串燒上加矜貴用料如金箔、黑松露、魚子醬，像燒白鱔，就先用鹽及白胡椒燒香，再加魚子醬點綴，食物同環境一樣咁 glamorous。
Qi Zhong Tian Signature $98/杯
7 杯招牌創作 cocktail，7 款味道各有特色，可一杯杯叫，自問酒量好也可挑戰全部 7 杯，但聽 bar tender 講，飲 3 杯已是極限。
魚子醬燒白鱔 $48
燒時用鹽及白胡椒調味，再加點魚子醬點綴，鹹香鮮味。
黑松露薄燒日本 A4 和牛 $98
鹿兒島和牛口感嫩滑，鋪面的黑松露醬更能帶出肉香。
巴馬火腿芝士拼盤 $128
有西班牙伊比利亞火腿、丹麥金文畢芝士，最適合叫一客來佐酒。
竹林白桃妃 $488/ 500ml
桃肉和酒都是限量製造，酒濃度不高，入口帶清新桃香。
七重天
地址：銅鑼灣登龍街 28 號永光中心 19 樓
電話：3998-3153
營業時間：星期二至日5pm-1am，星期一休息
收費：現金及信用卡，設加一
交通：港鐵銅鑼灣站 A 出口
泊車：附近咪錶位
平均收費：$150
