我人生同個「趣」字好有緣，一出世我就好「趣」緻啦，愈大個人仲愈有「趣」，大家又一定記得我同森美主持嘅《千奇百「趣」》，我份人又好鍾意食「脆」口嘢（同音，我屈機照計！），真係唔吃唔鬆「脆」，今次我要介紹一塊我人生口遇過最「脆」嘅雞扒先。
大家睇睇下圖塊炸雞扒先，大家請畀「脆」，賣定離手啦！塊雞扒嘅忠實 fans Otto 畀 10 個「脆」，我要畀夠 100,000 個「脆」先得。呢度係我哋商台嘅飯堂嚟，Otto 同班同事做完節目，好鍾意落嚟，貪呢度好食又夠平。
好多人嚟呢度，都鍾意食佢出晒名嘅沙嗲牛多、沙嗲牛麵或者奶茶紅豆冰，但大家知我唔食牛啦，Otto 就推介我食呢度嘅雞扒麵，唔食由自何，一吃真係終生難忘，塊雞扒個炸漿好鬆好脆，炸得乾身唔油膩，雞又醃得夠味，食落有啲似上海排骨咁，最抵死係咩呀？係兩塊打孖嚟，耶！我呢個弱質纖纖嘅女仔，一個人點食得晒喎！不過，真係超抵食囉。
嚟呢度，唔食多士即係等如無嚟過，呢度嘅多士全部加晒料。一款裏面有豆沙、另一款就係我之前提過嘅沙嗲牛，老闆話過我知，呢度嘅紅豆全部自己浸自己煮，沙嗲牛係用新鮮牛肉，最正係份多士即叫即炸，「脆」到無朋友，圖中啲多士我哋自己切開，一刀切落去麵包發出「嚓嚓」聲，唔會拖刀，一切即斷，好「脆」。上天真係偏心我呀，食親嘢都咁「脆」，開動開動。
樂園
地址：九龍城九龍城市政大廈 3 樓 6 號舖
電話：2382 3367
營業時間：星期一至五 7:30am - 4pm、星期六及公眾假期 7:30am - 2:30pm，星期日休息
(原文摘自《U Magazine》ISSUE 473、文：小儀、圖：Nova)
