香港人最幸福係咩？咪就係唔洗好似洋人咁注定吃冷藏海鮮，走入街市生猛游水海鮮任揀。做開廣告的店主 Amos 諗頭多多，唔想做到同普通火鍋館一樣，於是就利用香港有新鮮食材的優勢，將成個本土特色 Wet Market 濕街市放入火鍋店，變成街市‧火鍋 2 合 1 ，舖頭一邊喺「埋嚟睇埋嚟揀」的肉檔、魚檔、海鮮檔同菜檔，合眼緣就同負責檔口嘅街市哥哥姐姐落單，成碟靚料即時拎埋枱烚吓烚吓。
街市式火鍋唔係 gimmick，反而係真正揀手靚貨，舖頭放棄向供應商取批發價的貨色，每日下午4、5點，由店員直接從鄰近奶路臣街街市入貨，人肉分析邊啲靚、邊啲正先親自買返舖頭當火鍋料。
這裏海鮮最強，大花蟹、蟶子皇、花螺、東風螺、巨型象拔、南非鮑魚、黃沙蜆、花甲、連殼扇貝、蝴蝶蚌、花竹蝦海中蝦、瀨尿蝦、刀蚌、大馬貝、鯇魚頭、鯇魚片、泥鯭、游水墨魚等樣樣齊，款式齊過唔少專業海鮮檔，檔口準時 6 時開檔，好多平日鍾意去街市買靚料返屋企打邊爐嘅講究火鍋迷都突然轉軑來幫襯，一為買料價錢同街市差唔多，二來唔使走走趯趯咁辛苦，最大原因當然係唔使洗「事後碗」咁麻鬼煩。
鬼主意多多的 Amos 每月仲有爆趣主題火鍋推出，上月就推出過在客人面前點火的「玫瑰花雕醉雞煲蟹粉醬油鍋」，踏入聖誕月更爆趣推出幾近 live show 的火鍋，月月有新嘢。
