唔好以為我痴咗綫，寫錯條大題，去擺花街唔係扮晒嘢嘅西菜，居然去食平民美食－－豆腐花，無錯！喺全街都係高檔食肆嘅擺花街，真係發生咗呢件匪夷所思的事件。
不過，對於呢件奇幻事件，我司徒小儀有合理解釋，有無覺得老闆仔 Ray 好熟面口先？佢上過森美主持嗰個電視節目《我要做老闆》，佢仲打動班 banker、會計師，攞咗 10 萬元起動基金嚟開呢間舖。
Ray 在老牌豆品店「人和」當師傅 10 年，大無畏，人人認為喺中環開舖要 sell 高級，舖租咁貴，賣十元八塊的街頭小吃，一個月賣幾多先夠交租？佢覺得呢度係「非洲賣鞋」的真實寫照，全區無街頭小食，喺 Ray 眼中就等於無盡的 demand，於是就扑鎚揀擺花街。為咗實現做老闆嘅夢想，唔叻講嘢都一於上電視，憑真誠打動評判團。開張嗰日，森美仲特登過嚟支持。
老闆做事好踏實，唔搞花巧，正正經經做好豆腐花，呢度啲豆花糖水都係每日即叫即做，用加拿大有機黃豆每天早上鮮磨，再煮滾撞成豆腐花，成個過程一滴添加劑都無加，而且豆花糖水都唔會留過夜，港人港製，點都良心行先，唔使擔心食錯黑心食品。我食過呀，豆花好滑，豆味都唔錯，始終做 OL 生意，款式好多，豆花除咗可加傳統的女紅豆沙、綠豆沙、芝麻糊等，仲有健腸必吃的蘭香子同對皮膚好好嘅蘆薈㖭，食極唔肥嘅靚女 BB 又可以試下焦糖，焦糖水同豆花原來好鬼夾。
豆花豆漿之外，我要真心推介埋佢哋嘅辣辣三寶，嗰咖喱汁夠辣但唔鹹，啲魚蛋實淨彈牙，豬皮又無毛清得乾淨，蘿蔔又腍，feel 到幾有心，喺中環，三點三有啲傳統嘅街頭小食打救下，幾爽歪歪先得㗎！
我真心要講，呢間舖係小本經濟，訪問當日馮生媽媽都來舖頭幫手，與其讓鈔票外流到中環啲外資食店，都不如畀返同聲同氣嘅香港人賺。今個星期啱啱開始轉涼乾燥啦，點正氣、又滋潤豆腐花同糖水，阿媽實讚你乖呀！
杯裝原味豆腐花 $18
芝麻糊豆漿 $18
椰汁蘭香子豆腐花 $28
咖喱三寶 $45
焦糖豆腐花 $25
紅豆沙豆腐花 $25
蘆薈豆腐花 $25
夢想豆花
地址：中環擺花街 1 號地下 6 號舖
電話：2346 8889
營業時間：星期一至六 11am - 9pm，星期日 12nn - 7pm
(原文摘自《U Magazine》ISSUE 467、文：小儀、圖：sky)
