今年有一中一西餐廳，分別無限量供應太湖和荷蘭大閘蟹，焦點是：任．食！唔使就住就住，想食幾多都得。
紫粵軒 - 5小時任擦太湖蟹
任食放題一般都有限時，難得這間酒店級粵菜廳，破天荒出不設時限的大閘蟹任食套餐，客人可由晚上6時食到11時為止，足足5個鐘，超抵！
餐廳所用的大閘蟹統統來自太湖，每隻約4-5両，雖未到十月中最當造時份，但現時的質素也不賴，隻隻都爆膏厚肉，蟹膏味道已經甘香突出，兼帶少少黏口白膏。客人每次柯打可叫2隻，約等20分鐘，全部即叫即做，確保新鮮度，甫入座更會奉上花雕醉雞及話梅石榴果做前菜讓客人等待時食，貼心。計落街買一隻太湖蟹都要五六十蚊，食夠6隻就可回本，加埋任飲菊花薑茶，食夠10隻都無有怕。
大廚更炮製了種新食法，除了傳統的紫蘇葉外，更可以菊花、薰衣草來蒸，一打開蓋便滿室清花香；另外2款則是鹽焗和風沙大閘蟹，前者經1小時烘焗，蟹身被抽乾水份，蟹膏變得結實帶甘香；後者加有大量蒜蓉、泡椒等一同炸香，惹味得猛吮手指，驚喜！
任食大閘蟹套餐成人$360位，小童 $180 位(2位起)
可任食5款做法的大閘蟹，愛惹味必試風沙，如果想原汁原味又要獨特一點，可揀薰衣草蒸，邊吃邊聞到陣陣花香。
花雕醉雞
嫩滑雞肉帶來淡淡花雕酒香，一口雞一口蟹，味道好夾。
話梅石榴果
話梅與花雕是perfect match，和大閘蟹更是鐵三角！
菊花薑茶
用上新疆崑崙雪菊做薑茶，香而不寡。
紫粵軒
地址：將軍澳唐德街3號香港九龍東皇冠假日酒店2樓
電話：3983 0688
鮮薈 - $180 狂吔荷蘭蟹
過去兩年，荷蘭野生大閘蟹風頭一時無兩，賣點乾淨安全，所以不少蟹迷轉投入手荷蘭蟹，今年歐洲大閘蟹起家的鮮海鮮吧首次推出任食套餐。這個任食套餐在下什供應，賣點是價錢平，$180月交易，每日12nn-5pm供應，限時50分鐘，期間可無限任食3両重的荷蘭野生大閘蟹。雖然3両蟹確實偏細，但由於今年收成好，因此隻隻蟹都可見蟹膏滿瀉，質素不賴，食得過。以拆蟹每隻需時10分鐘計，密密食應該可食上隻，按蟹價$50隻計算，直情回本有突！跟套餐加$10更加任飲薑茶驅寒，當brunch或下午茶都得。
50分鐘任食荷蘭大閘蟹餐 $180位
雖然3両蟹細細，但膏多肉滿，質素高！
FreshLodge Crab Platter $318
如果嫌唔夠喉，可另點蟹拼盤，包括半隻法國睡蟹，5両重大閘蟹及阿拉斯加蟹腳。
食快啲拆蟹TIPS - 限時要食到盡，必學：
-先將蟹腳完全剪掉。
-把蟹身底部打橫剪走，再在中心剪分成兩半，挖出蟹肉吃。
-另蟹腳中段剪掉頭尾，並用蟹爪插進蟹腳中向上推，便可把蟹肉原條拆出。
鮮薈有自家研發的綁蟹方式，繩條全用全棉和橡膠製，更加有彈力，輕輕一綁就得，已申請專利，方便又輕身，蟹更足秤。
鮮薈海鮮吧 FreshLodge
地址：上環永樂街127號
電話：3106 3161
備註：最好預訂
(原文摘自《U Magazine》)
更多2014 大閘蟹情報：大閘蟹 特集
