任你平日幾愛食拉麵湯麵，天時暑熱，也難免要轉投冷麵涼拌麵的懷抱，冷麵新 trend 是加入鮮果，爽！
驟眼睇，碗冷麵鋪上檸檬片，好似成碗凍檸茶咁，這是西環「巨二麵堂」的新作，名叫檸檬冷麵。店內的日本師傅來自北海道，家鄉有用檸檬來做冷麵的習慣，他便複製這種滋味，在新店開張時推出。
師傅精挑美國檸檬，貪其質素穩定，酸香有致。做呢碗冷麵，其實都幾花工夫，要先將雞、豬骨及雞腳等自家熬製的高湯冷藏，隻拉麵碗又要冷凍，然後切檸檬、煮麵後再過冷河，在雪到凍的碗內加入醋、麵豉醬油及橄欖油等，再分別加入冷高湯、麵、蔬菜、溏心蛋及檸檬片等，當然唔少得招牌牛舌。呷一口湯，cool 到震，散發出陣陣檸檬香，原來師傅將檸檬汁混在其中，還教路要篤檸檬片，等檸檬汁滲進麵中，多一點酸香，更醒胃！
檸檬冷麵 $88
夠晒冰涼的冷麵，味道配搭剛好，入口充滿醬油香檸香高湯香，配搭牛舌有嚼勁。
巨二麵堂
地址：西營盤高街 29 號高宏閣地下
電話：2803 0026
營業時間：12nn-10:30pm
(原文摘自《U Magazine》)
