古巨基最近既完成人生大事，古氏伉儷又跟朋友合資的餅店 Alice Wild Luscious，可謂雙囍臨門！
基仔雖首次進軍飲食界，但有 Regina 做餅店 Partner，便可補經驗不足。她曾引入新加坡朱古力品牌 awfully chocolate 及開設芝士餅專門店 Cheesess，她說：「基仔、Lorraine 都很喜歡食我的蛋糕，原本是計劃跟基仔的潮服品牌做 crossover，但傾過一兩次後，發現想做的事太多，便不如合作開店。」麵包酥點會先在工場做出半成品，然後再店內即場烘焗，特別新鮮。
別以為基仔只是掛名老闆，查實落力參與，店名 Alice Wild 便來自他創作過的角色，另外，店子 Logo、室內裝修、包裝盒設計、選食材、甜點麵包的賣相，都是他的 idea。店內每款出品起碼試過廿次才推出，連搬桌椅、擺位都自己出手，百分百投入。
以藍色為主調的店子，一開兩間像個相連「單位」，一間主打甜點，另一間賣麵包酥點。甜點那邊有單件裝蛋糕、銀色杯裝甜點及雪糕，沒拘泥傳統定創新，像法式 Mont blanc 內裡竟有芒果流心；杯杯木糠布甸內，卻夾了層香檳軟心，都是基仔的鬼主意，總之要又靚又好味！
至於麵包，牛角包以外，還有多款酥點，像提子、朱古力、榛子，也有少見的荔枝味，而變大了的酥點，加入芝士、磨菇及火腿等，就像個 Pizza，店方還提供麵包袋，方便你拿著邊行邊吃。店前有舒適座位，等大家坐低慢慢歎，隨時見到基仔夫婦甜蜜巡舖！
栗子芒果流心蛋糕（前）、紅莓子朱古力蛋糕 各$42/件
前者是古生心水，還創作在栗子蓉跟栗子慕絲內，加入芒果流心，有驚喜！而古太則愛朱古力蛋糕，採用濃度70%的比利時朱古力，質感是香軟 truffle，底層有紅桑子啫喱，帶果香。
牛角酥 $14
以法國 A.O.C. 牛油、麵粉等炮製，師傅說最少有 100 層酥皮，香酥鬆軟。
綠茶白朱古力蛋糕 $42
基仔、Lorraine 要求高，這蛋糕仍在不停 fine tune，抹茶粉結合了韓國及台灣出品，綠茶慕絲夾著白朱古力慕絲，有層次。
玫瑰荔枝 $48（前）、芒果奶凍 $48
銀杯子甜品精美，少用魚膠粉炮製，特別滑溜溜。這款沒下牛奶、只得忌廉的布甸，混合了玫瑰荔枝 Puree，味道獨特。以時令呂宋芒炮製，分量多，非常甜香，芒果肉下還有芒果慕絲及混合雲呢拿籽做的奶凍。
薄餅芝士漩渦酥 $22
這款是 Lorraine 心水，富牛油香的酥點加入火腿、芝士及磨菇等，像個 Pizza，放入紙袋可邊行邊食，貼心。
Alice Wild Luscious
地址：中環鴨巴甸街 35 號元創坊 H102-103 號舖
電話：28381314 （甜點店）、28384858 （麵包店）
營業時間：星期日至四 12nn-8pm；星期五及六 11am-9pm
(原文摘自《U Magazine》文：Winsome、Pam、圖：Keeyau、Kam、有關機構)
