今晚打老虎，我梗係唔係賭~賭~賭~聖啦！更加唔係用法文 Comment allez-vous？問候大家。我嘅任務更加艱鉅，真係去打老虎呀，夠膽嘅一齊 Let's go。
打大老虎，第一件事梗係確認下地理位置先，google maps 接駁中，原來嗰老虎竇喺銅鑼灣邊陲一幢舊樓，佢哋做晒軍事準備，將成幢大廈油咗老虎紋，咁大個目標豎起度，準備行動。
Roger 總部：特工 Kitty 而家潛入去探路。咦！老虎竇用日本咖喱飯店作掩飾，真係有咖喱飯食喎，呢個時候有個生得好似阿部寬嘅日本男子（見圖）行出嚟，用帶口音嘅廣東話：「我認得你！」原來佢就係老虎大王 Satoru San，佢係中環 Sushi Kuu 嘅總廚兼老闆，多年前我喺佢間舖食過壽司，咁既然畀你點咗相，我都唔客氣話畀你知我嚟試食啦，攞碟老虎咖喱飯出嚟先講！
咖喱飯睇樣都相當強頑，一半咖哩汁、一半白飯，上面再有一塊大殺傷力嘅吉列黑豚，一啖入口，唔得了，一股熱力湧上嚟，Kitty 噴火，非同少可。Satoru 捏開壽司，做咖喱飯都好狠，原來佢聯絡咗班聯合國 Spice Master，呢班嚟自印度、馬拉同日本嘅咖喱專家密謀研究大殺傷力嘅新咖喱，煮嘅時候落足 28 種材料，除左平常嘅黃薑同肉桂外，仲有時蘿同印度 Masala 醬、Mango 醬同 3 種辣椒，所以食落比平時甜甜哋嘅日本咖喱，又辣又有辛香，屬中殺傷力武器。個飯用珍珠米，乾爽又彈牙。老虎一出，我唔驚你㗎，一於剝咗隻老虎牙先！
連沙律醬都加咗咖喱汁、炸麵包捧中間係咖喱、薯條用芝士焗完再加埋咖喱汁，老虎出山，好多敵人呀，等我食晒你哋完成今期嘅任務啦。
P.S.：呢度有碟叫「無牙老虎」嘅牛飯，個汁醬係番茄做，唔嗜辣嘅一樣可以打老虎。
黑金豚咖喱飯 $95
老虎紋薯條 $45
有料麵包棒 $38
老虎吼沙律 $48
珍寶炸蝦咖喱意粉 $90
Tiger Curry
地址：銅鑼灣邊寧頓街 14 號地下
電話：2511 1051
營業時間：12nn - 11pm
(原文摘自《U Magazine》ISSUE 452、文：小儀、圖：Lamlam)
