哦哦哦！你哋心邪，以為我講識男仔。雖然我都想好似小 S 咁喺轉角遇到小豬，你哋估嘅都啱一半咋，因為我今次仲叻過小 S，唔單止遇到 1 個男仔，仲比小 S 多遇到一大堆美食，等我沾沾自喜一陣先。
呢間 cafe 喺正正街街市對面，位置好得意，舖頭出面忙忙碌碌好有生活感，但舖頭喺斜路，又係轉角位，細細間咁好 cozy，老闆幫間舖打扮到又悠閒又有小清新氣息，嚟食嘢好有偷閒 feel 㗎，呢樣亦係我鍾意呢度嘅原因。而家有扶手梯，熱屎辣辣都唔使行到大汗叠細汗上嚟，幾爽。
好啦，講返個正餐先。我要先講個男人，我身後面嗰個鬍鬚仔咪就係老闆 Charcoal 囉，住喺西環 6、7 年，見到呢區都無四正Cafe，於是就索性自已開。咪睇佢斯斯文文，佢係大廚嚟，喺上海酒店做過總廚，仲喺西邊間開過 cupcake 店 Eat My Cakes，開舖唔係亂咁嚟㗎！
男孩們甜品都唔食，但 Charcoal 整甜品同批好有一手。呢期我成日嚟買佢哋啲批外賣做晚餐，好難得佢整嘅批皮唔會又厚又實，厚薄適中唔會食到你一口粉，最開心係啲批日日整，返到屋企烘返熱唔會又硬又一陣雪味，裏面啲餡都新鮮，我鍾意雞肉蔬菜、素嘅就有蘑菇粟米芝士，香噴噴熱辣辣，啱啱好可以當一餐晚餐。
嚟到我唔准你哋唔試埋佢嘅檸檬撻同香蕉拖肥撻，因為兩款都好正，個檸檬撻撻皮又脆又鬆化，仲有牛油香，中間的檸檬醬酸甜醒神，仲有少少甘甘哋嘅檸皮，好正；香蕉拖肥更係我至愛，睇見佢咁多 cream 你會驚？唔使喎，我人肉試過，打得好輕好軟，仲要有新鮮香蕉味，唔會漏㗎。下午時段食件 cake 後買埋批走，咁就唔會咁 full 囉。
仲有，若然你係早起身嘅朋友，記住要嚟吃佢嘅杏仁牛角包，因為小量製作，中午過後成日都賣晒，配埋 Charcoal 用意大利 Vittoria 阿拉伯咖啡豆沖嘅手搖咖啡 Shake-a-latte，好想搵次早上嚟歎，扮嘢法國人先。
Corner Cafe
地址：西環正街 56 號
電話：3480 8436
(原文摘自《U Magazine》ISSUE 448、文：小儀、圖：Lamlam、Jason)
