媽媽最錫住仔女荷包，食得貴，老媽子肉痛！所以要帶佢呢間，請佢食連政商界名人都激讚的大師傅手勢，價錢呢？梗係抵啦。
明珠小館最近改名為明珠閣，請到施輝擔任顧問總廚，他入行 50 年，前美國總統克林頓及喬治布殊、已故戴安娜王妃及前港督彭定康等都是他座上客，又曾在北京王府飯店、半島酒店集團及隆濤院等掌廚，間間有分量，但呢度平均消費才 $150，真係食得過。
施師傅的新餐牌主打粵菜，家常小炒、手工菜式，甚至預訂食私房菜都得。叫得媽媽，記住提早訂菜訂，因為想試肥彭大愛的「發財鴛鴦寶」、教戴妃鍾情的「花枝招展」，必需預訂，而且仲好貼心咁可以逐件計錢，母親節期間照常供應，等媽媽試佢偶像戴妃口味。
當然一樣有母親節套餐，由兩至八位用都有，今次介紹的 4 人餐菜式不乏師傅拿手的蜜汁大封炒鴿脯、桂花炒魚肚等，最正係可以畀老媽子吃溏心乾鮑魚，相當豐富。
名人御廚 施輝師傅
他為無數政要名人下廚，技藝高超，來這裏就可嘗到他的手工菜。
櫻花蝦瑤柱蛋白炒飯
帶點新意的炒飯，內有蛋白、瑤柱、菜粒及櫻花蝦等，炒得清爽不膩。
戴妃至愛 - 花枝招展 40/件（需預訂，兩件起）
釀入鹹蛋黃的墨魚丸，造型、味道均有驚喜，令戴安娜也為之迷倒。
肥彭狂食 - 發財鴛鴦寶 $50/件（須預訂，2 件起）
肥彭大讚的佳餚，施師傅以帶子及瑤柱煮出兩種滋味，露筍中更釀入金華火腿，手工精細。
桂花炒魚肚
粵菜著重鑊氣，大廚便將芽菜、蟹肉及魚肚絲，加點泰國大蝦膏油炒得鮮香撲鼻，微辣惹味。\
北菇原隻溏心乾鮑魚
28 頭南非乾鮑入饌，以火腿老雞赤肉扣煮至入味，軟綿煙韌，還食到中間有溏心！
木瓜花膠燉雞
將木瓜花膠及雞燉足 5 個鐘，滋潤養顏，媽媽飲完更靚。
蜜汁大封炒鴿脯
鴿脯厚肉，連同冬筍、菇片炒香，加點大地魚粉更濃惹；伴碟的蜜汁火方，片片鹹中帶香甜。
餐廳環境 Cozy，布置偏古色古香，窗外更可看到九龍公園景色。環境古雅樸實，啱一家人吃飯。
明珠閣
地址：尖沙咀彌敦道 100 號 The ONE UG 層 221 號舖
電話：2703 9333
備註：母親節餐供應時間為 5 月 9 日至11日，午市及晚市均適用，手工菜早 1 日前預訂即可
(原文摘自《U Magazine》文：Pam、Sieg、圖：Jay、Nova、Paul、Sky)
