1. 又話腥又要食沙嗲魚串
波作隆雙魚牌沙嗲魚串 $6.9（b）
沙嗲魚串堪稱懷舊零食之最！廿幾串紥埋一齊，成把扇咁，細個拎住佢，逐串逐塊食，好滋味！零用錢唔夠，又可以逐枝散買，大約 5 毫子串。細個時食覺得真係有魚味（其實係腥味），面層令立立黐立立，食落甜甜辣辣仲有少少魚味（細個時覺得係魚味）。咁古舊（口既）零食估唔到而家仲有，呢款叫來自泰國的「波作隆雙魚牌沙爹魚串」，一包有 24 枝，唔知係時代變咗，配方改咗，定係人大咗，口味變咗，而家食落覺得有啲腥同硬，仲有啲羶味㖭！情懷搭夠啦！
2. 「三枝香」惹味卷
時興隆咖喱卷、辣味卷 $4（a）
三枝裝惹味卷，係小學雞經典零食，有咖喱卷、辣味卷及芝士卷 3 種口味，雖然有三枝但唔會大吉利是，因為細個時好多同學鍾意邊咬着邊用嚟格劍，當武器咁用，其實係好好玩嘅。我仲記得，以前包裝有部分係透明嘅，睇到裏面三枝香，唔怕買錯！
3. 立黐黐魷魚酥
時興隆嘅廣告深入民心，除咗魷魚絲其實仲有紅色包裝嘅「真魷味魷魚球」，咬落有好大陣魷魚味，顏色橙橙哋好鮮艷，拎上手有啲立黐黐！令小記記起有位小學男同學，用手拎起食落口後，隨手又抹落件白色 PE 衫上，番屋企應該被阿媽鬧 lol！
時興隆真魷味魷魚球 (左) $2、珍珍牛仔片 $3.5（a）
4. 惹味牛仔片
而細個鍾意食香口嘢，除咗薯片，「珍珍牛仔片」係我至愛。牛仔片點解叫牛仔片？係有牛肉風味吖？定個包裝真係有隻牛仔呢？到而家都係一個迷。不過算啦，鍾意食大晒！情意結（口既）嘢，好難解釋（口既）。牛仔片細細包食極都唔夠，但愈細包愈覺滋味。兒時牛仔片係一整塊，而家就變咗薯格，味道如一，都係咁惹味。
5. 伴你成長金龜嘜魷魚絲
時興隆金龜嘜魷魚絲 $8.9（a）
曾共渡過漫長的歲月關心你每處為你愛多一點……呢首洗腦廣告歌，一聽就諗起時興隆，真係好成功！藍色包裝嘅「金龜嘜魷魚絲」食落都幾腥，但又係令人吊住食嘅零食，睇落覺得分量好少，原來佢有分 7g、13g 及 21ｇ三個包裝，我一定食最大包嘅。
6. 紙咁薄成紮食鱈魚絲
大發鱈魚香絲 $10（5 包）（a）
除咗魷魚絲，細個仲鍾意食紙咁薄嘅鱈魚絲，成紮放入口，感覺好爽！入口唔算腥，甜甜哋，最啱一邊煲劇一邊食。十蚊五包抵到笑。
7. 37 歲喇！得意愉快動物餅
愉快動物餅 $5（a）
唔經唔覺原來愉快動物餅已經 37 歲，80、90年代本身叫「得意動物餅」，約廿年前開拓中國及台灣市場才改名「愉快動物餅」。香港最常買到的有牛油及紫菜味，日本則額外有朱古力、香蕉、蜜糖味等等。餅乾上印有 46 種不同動物的英文名，你細個時有無學到啲英文生字呢？
8. 大大啖啪入口 媽咪麵
媽咪麵 $2 （b）
講到邪惡零食，唔少得媽咪麵，細個時總會大啖大啖啪落口，包裝上個隻藍色毛毛怪，曾經係媽咪麵廣告嘅代言人，有無啲感覺好似怪獸公司嘅 MOMO？
仲有咁多懷舊零食嘅地方，真係賣少見少，見到呢類小店要多多支持呀！
售賣點：
（a）
好多多直銷中心
地址：大埔廣福里 13 號 A 地下
電話：2656 3614
（b）
味之誘惑
地址：調景嶺都會駅商場 L2-034 舖
電話：3153 2100
文：Celia、攝：Lok
歡迎你 like 我哋 U Food Facebook Page / U Food Instagram ，取得我哋更新更快嘅資訊！
