text│kathryn photo│kee
新開的炒飯專門店請來曾任利苑酒家有 16 年入廚經驗的廚師，將茶記的「佬味」碟頭飯升格為中高檔版炒飯。店內炒飯介乎 $50-$150，有平有貴。炒飯相當講究，也考功夫。用泰國金紫荊米，取其富米香及吸水力平均，炒起來又不會黐埋一嚿。要炒出一碟靚飯，師傅表示用足夠的雞蛋，可以吸走多餘的油份，最重要是快炒至乾身後，還要將飯粒在鑊內兜炒一次，才做到粒粒分明。
必試即炸即炒的招牌椒鹽豬扒飯，因為每客要等 15 分鐘，一小時只供應到 4 份，可謂慢工出細貨，想食就要俾啲耐性。豬扒外皮香脆多肉汁，金黃色的炒飯很夠鑊氣，蛋香十足。時令乾坤金鍋蟹粉炒飯也值得一試，加入江蘇大閘蟹蟹粉和生拆蟹肉一同炒，飯面亦有蟹粉及蟹肉，為炒飯添上濃郁的蟹味，食到啖啖蟹肉，相當足料。
除了炒飯，店內都有充滿港式風味的特色小食，包括金飯仔三寶（即牛柏葉、水魷魚及豬皮），淋上香濃又富花生香的秘製沙嗲汁，非常惹味；白灼厚切黃沙豬膶則口感爽滑彈牙，鍾意街頭小食的可以一試！
米飯炒得靚，最重要落足雞蛋，炒到乾身金黃還要在鑊內兜炒一次才上碟。
秘製沙嗲牛肉雙燶邊蘭王蛋飯 $78
沙嗲牛用美國牛冧肉混秘製沙嗲汁，牛肉有嚼勁、沙嗲味香濃，亦加入相當揼本的蘭王蛋，蛋味濃郁。
椒鹽豬扒飯 $78
豬扒以秘製醬汁及蒜蓉汁醃得入味，有柯打才伴以辣椒乾及蒜頭即叫即炸，添加香氣。製作需時 15 分鐘，想吃靚炒飯要有耐性。
脆皮牛腩飯配秘製沙嗲汁 $78
以滷水燜至入味的牛爽腩，外層沾脆漿酥炸至金黃色，皮脆肉嫩，可配秘製沙嗲汁食用。
金飯仔三寶 $48（上）、白灼厚切黃沙豬膶 $58（下）三寶有牛柏葉、水魷魚及豬皮，淋上秘製沙嗲汁，沙嗲味香濃富花生香，非常惹味。厚切黃沙豬膶則以料酒及調味料調製，爽滑彈牙。
時令乾坤金鍋蟹粉炒飯 $138
加入江蘇大閘蟹的蟹粉和生拆蟹肉炒，飯面鋪上蟹粉及蟹肉，相當足料，食到啖啖蟹肉。
【info】
金飯館
地址：牛頭角牛頭角道 323 號地下 J 號 1 舖
電話：6366 9538
營業時間：11:30am-10pm
