text│Yan photo│Man
上勝是荔枝角 OL 界的口碑小店。一碗有齊牡丹蝦、中拖羅、拖羅蓉、油甘魚、帶子、三文魚和海膽的特盛丼，配埋三前菜一湯的午市 set 只需 $198，比起不少中檔壽司店平近一半。
小店最近搬舖，用餐環境大提升。設計年輕新潮，最重要地方大咗，坐 50 人都鬆動舒適，簡約淺木色搭大地灰家具，格調三級跳，但丼飯仍然保持親民價。最抵吃的推介，有海膽、油甘魚和三文魚的海膽雙魚丼 set，$85 咋！小店每日由日本各漁市場直送海產，朝捕晚送，原條鮮魚自家處理，魚材也絕不留隔夜。如北海道帶子、長崎縣拖羅及北海道馬糞海膽等，刺身光澤誘人，入口鮮甜爽活，達中高檔鮨店水準。
另外，丼飯飯底也要讚，用七星米，以江戶前壽司的赤醋飯代替白醋飯，微微酸甜、醇香提鮮，口味更加高雅。店內的丼飯落足工夫炮製，卻只收中檔迴轉壽司價錢，糧尾都食得起。
【info】
上勝日本料理
地址：荔枝角長沙灣道 883 號億利工業中心地下 1B 號舖
電話：3997 3896
營業時間：11am - 3:15pm、6pm - 10pm
