煙煙韌韌的芋圓這種小食一向受香港人歡迎，這小店出品是小編食過數一數二高質素的，芋圓每日人手鮮製，口感 Q 軟有芋香，出品拍得住台灣！
店主係情侶檔 Karl 和 Yan，兩人都係芋圓癡，在家日整夜整鑽研出心水配方。開業短短一年，已有不少捧場客，日日用 30 斤芋頭搓芋圓，還未計地瓜、紫薯圓，各式芋圓星期五、六更瘋狂到下午已售罄！
鮮製係主要原因，無添加色素、防腐，又低糖，食芋頭味同口感都好出色。芋圓大大粒，食落軟綿帶 Q 感，又唔會太粉，愈咬愈有芋香。
Karl 每次取出粉糰再以掌心搓揉，還會仔細檢查當中有沒有未攪爛的芋頭肉才搓成條狀切粒。為了突出芋頭香，芋圓也切得特別大粒。
雖然人手有限，他們堅持每 2 小時煮一次芋圓。剛煮好的芋圓還會以冰水過冷河提升煙韌度。坊間慣常做法會將煮好的芋圓泡於糖水中以免黏在一起順道提味，這裏則改良成撈入砂糖，甜味有助帶出芋頭香，仲可以逼出多餘水份，使芋圓更 Q 感，也不怕浸糖水浸到口感過軟過甜。
芋圓可自選配料，有傳統的仙草、紅豆、蜜芋頭，新派些配自家製椰子凍、奶茶凍，食法超百搭，講起又想去食返碗。
芋圓控
地址：觀塘駿業里 6 號富利工業大廈 11 樓 C 室
電話：從缺
營業時間：星期一至六 2 - 7pm，星期日休息
