港人愛打邊爐的程度不容輕視，因應這份熱情，坊間愈開愈多任食火鍋店，有平有貴。
小編最近就潛入一間「觀塘人」介紹的火鍋店「囍」開餐，每位收費最平$84就有交易，任飲任食，價錢就幾吸引，其他方面又有無伏呢，即刻試試！
火鍋店位於一幢商廈，距離觀塘港鐵站都一段距離，大概要走10-15分鐘。火鍋每晚供應，任食時段由6pm至11pm，用餐時間有90分鐘。
平日去到人流不多，極速被安排入座；餐廳座位大多以梳化卡座椅為主，坐得舒服，適合三五知己gathering。
小編order了最便宜的任食套餐，只需$84即可任食黑豚肉，以及自助吧上的所有配料。
湯底方面，推介皇牌木瓜椰子雞湯，煲滾鍋內的椰子水後，加入「黃金雞」雞件，2-3位有半隻，4位以上有完整一隻。雞件的油脂不算多，加上椰子水味道清爽，整體香而不燥。
跟坊間的日式放題店差不多，店員會首先送上每人一份肉，任食套餐包含的黑豚肉質素幾高，薄切柔軟，而且油脂分佈平均，灼兩灼就食得。
不過每次出餐的豚肉份量少，每人每次得兩片，還好侍應時時詢問有無需要添加。不過小編食飯當日人流不多，未測試到人多時服務質素會否下降，希望keep到！
自助吧方面，供任食的食品選擇也不少，超過30多款，當中包括丸類和蔬菜；另有4-5款凍盤和熱食，如卷物、涼拌芽菜、茶葉蛋，質素中規中矩。
值得Encore的食品有：芝士丸、脆皮芝士腸、粟米、秋葵、冬瓜，椰子雞湯加入粟米和冬瓜等蔬菜，味道更加清甜。
店內亦設醬料區，供食客自己混醬。
主食以外，雪糕乳酪和飲品（紙包飲品、汽水、啤酒）都供任食任飲，不過小編個人就覺得FROYO味道較一般，不用特意留肚食。
$84放題絕對可以食到飽，肉類和蔬菜的新鮮程度都令人滿意，回本無難度，但未到令人驚喜的程度，推介給九龍區朋友，出開觀塘碼頭/海旁的話都值得一食！
--------------
各套餐收費：
1. 任食美國黑豚肉+火鍋配料（加送黃金雞）
星期一至四 $84
星期五至日 $94
*不可追加刺身放題
*成人、長者、小童同價
2. 任食黃金雞+美國牛肉+美國黑豚肉+牛舌
成人 $128
長者/小童 $98
3. 任食黃金雞+美國牛肉+美國黑豚肉+牛舌+海產
成人 $168
長者/小童 $118
4. 任食黃金雞+美國牛小排+肩胛牛肉+美國黑豚肉+牛舌+海產
成人 $238
長者/小童 $178
5. 任食黃金雞+美國牛小排+澳洲和牛+美國黑豚肉+牛舌+海產
成人 $298
長者/小童 $218
*不可追加刺身放題
*以上費用另收加一
文：HK港生活
