他不是甚麼老街坊，竟然是一位 80 後年輕人，阿原打從 14 歲便入行做廚師，3 年前開始創業做茶餐廳，一直不忘自己的「架己冷」身份，終於在兩個月前租下二陂坊的舖位，做潮州滷水、打冷之餘，又供應有小炒、打邊爐，午市甚至供應客飯，地方企理乾淨，在本來人流較少的二陂坊，竟也吸引到不少街坊光顧。
店內食物款式齊備，韭菜豬紅、煎蠔餅等打冷有風味，必試各種海鮮，全是阿原每日驅車至遠遠的屯門三聖親自挑選，專挑大隻又新鮮的琵琶蝦、蜆、扇貝、花蟹、魚等，加上凍蟹、監焗烏頭、時令螄蚶等，別具潮式風味。海鮮來店後用鹹水養，客人即場揀好再自選清蒸、白灼、油鹽水焗、豉椒炒等，約一斤重的新鮮龍蝦才售 $180，比市價平兩、三成。吃打冷一定要飲返枝冰凍啤酒，再配幾道小炒更有風味，阿原跟大廚好老友，經常一同創作惹味小炒，用泰式辣椒膏炒蟹，香辣鮮甜，又以大量辣椒炒豬大腸、椒鹽做法炮製茶樹菇等，啖啖香口，均是佐酒佳品。
椒鹽茶樹菇 $60
將幼身的茶樹菇以椒鹽做法炸至香脆，爽口又有菇香。
薑蔥爆魚卜 $78
每日有相熟魚檔留起新鮮魚卜，以薑起鑊爆香魚卜，用煲仔熱住吃 keep 到鮮味。
潮式螄蛤 $70
用醋、檸檬、辣椒、蒜頭將螄蛤生醃，啖啖酸辣鮮味，愛吃螄蛤的話必點。
泰式辣椒膏炒蟹 $180
以泰式辣椒膏及金不換去炒蟹，肉蟹有 12 (兩)重，細細隻幾好肉地。
辣子炒大腸 $78
大腸先用滷水滷 1 小時，再炸香，跟大量青、紅辣椒炒，非常惹味。
凍龍蝦 時價 $180 起
老闆全部挑選 1 斤以上的龍蝦，啖啖肉非常鮮甜。
凍花蟹 約價約 $480/隻
2 斤重的花蟹有兩隻手掌咁大，蟹肉鮮味突出。
地址︰荃灣二陂坊地下 6 號
電話：2614 1688
(原文摘自《U Magazine》文：Pam、yoyo、圖：Chow、Jay、Paul、Suki)
