鐵桶豬皮店 SAMGYUPSAL
煲紅豬皮店一定係早一兩年超紅嘅《秘密花園》，睇到 Fans 流晒口水、玄彬同成班武術學校學生在劇裏晚晚蒲的豬皮店「兩 Daepo 燒烤」居然倒模式開在尖沙咀，少女終於找到遙控親親「金洙元」嘅方法。
睇過韓劇都知道真正的韓燒其實超簡陋，找幾個汽油鐵桶，內裏放燒着的木炭加塊鐵板，圍埋就燒得，而且食嘅以下欄平價的豬內臟居多，一班韓人圍住個鐵桶隊酒吹水，十足十我們的大排檔。
估唔到這店將當地豬皮店的場景複製過來，店東把這裏打造成 70、80 年代韓國鐵桶燒烤店的模樣，更特地空運一位韓國電影海報畫師來畫上韓國奧運滑雪隊、權相佑及三一萬能俠等壁畫，舖內的「首爾感」超強；唯一不同是這裏的大鐵桶唔再用木炭，反而換上石油氣爐，變成座位的鐵桶，坐墊更可以打開，讓食客放置衣物手袋，無論你點燒，隨身物都不會沾惱人的燒烤味，好細心。
講到最最最正宗之處，就係店方將韓國地踎嘅下欄佳品，如燒豬皮、牛小腸、牛胃、鳳爪、豬腸、雞腎及雞皮都一一提供，烤豬皮及牛小腸只此一家。比起燒牛肋骨，燒豬皮更有趣，睇住一張演唱會門票大小嘅潔白豬皮在鐵板上受熱捲起，再慢慢滲出油脂變成金黃加半透明，隨之而來是撲鼻的豬油甘香，再剪成 1 吋 x 1 吋大小放入嘴，香口煙韌又富膠質，你就明白《秘密花園》裏嘅玄彬為甚麼會頻頻對住塊豬皮講「我要將它融化來吃！」
燒豬皮、燒內臟以外，還有唔少地道的韓式燒烤生料供應，連首爾都唔算多的烤海鰻、香港只此一家的濟州黑毛豬肉、韓國生蠔、貝類、大小八爪魚等高檔貨都有，當然還有加拿大美國來的燒牛排、雪花牛，唔使怕唔識燒，場內的美少女侍應好醒目，見你燒得手忙腳亂會主動上前翻動肉類，更會提醒你幾時挾起，肉類唔怕燒到韌晒老晒；燒燒吓，想飲吓湯、食吓鍋物、麵食及蒸蛋都有，而且每枱旁邊仲裝咗供電話叉電架子免費畀你充電，服務一流。
BBQ 7080
地址：尖沙咀山林道 54-56 號利雅商業大廈 1 樓
電話：2735 2099
頹廢大學部隊鍋 BUDAE JJIGAE
部隊鍋係每個韓國頹廢大學醫肚佳品，在韓國普及到好似我們的雞煲。這兩年它攻陷香港，都係多得韓劇經典《我的野蠻女友》煲紅了東大門 Nolboo 部隊鍋連鎖店。罐頭茄汁豆、午餐肉及腸仔加埋韓國國粹辛辣麵煮成一鍋，集 Junk food 之大成，試問我們吃味精大嘅，又點會唔愛？連人氣女團 Secret 都搶住做此鍋代言人。
香港都有專攻部隊鍋的店，店裏的師傅更找來韓國廚藝專家做顧問一同出征首爾，試勻當地 20 - 30 所大大小小的部隊鍋店，終於選擇在江南一所老店學正宗煮法。這裏跟足韓國傳統做法，菜湯底要落椰菜、洋葱、番茄等，湯料更要佔足 1/3 並熬足 5 小時才夠味，還要加少量的豬骨吊味，湯頭才甜。再將唔多好食的韓國香腸、午餐肉換成更高檔的意大利莎樂美腸、德國腸及本地午餐肉做配料，加埋韓版的辛辣麵，味道可能比遊韓人必去的 Nolboo 食到的更好喎！
Cooking Mama 360
地址：旺角彌敦道 750 號始創中心地庫 1 層 B01店
電話：2625 4277
(原文摘自《U Magazine》文：Sieg、圖：Sky、Kee、Nova)
飲食熱話
《U GO》回本小隊 ：召集最真實Buffet食評 ！
簡單分享必食推介、避伏心得、回本攻略😋贏走獎品🎁
U Lifestyle App大派Stecco Natura意式雪條1000條！
↓ 百分百意大利進口保證原汁原味↓
