名人明星捧場客有許志安、彭浩翔、蘇志威等，又有米芝蓮車胎人推介。既然主打海鮮，自然有大大個魚缸畀你任睇任揀，沙巴龍躉澳洲青邊鮑肉蟹膏蟹紅蟹瓜子油斑等，精選野生貨色，食味、肉質自然高幾班。
這裏雖有傳統菜，像扣鮑魚，但煮法獨特，將澳洲青邊鮑仿效乾鮑炮製，同樣用金華火腿、雞腳、老雞、赤肉、豬皮等，一齊慢煮 72 小時，腍滑煙韌，更有溏心效果。
簡單如粟米魚塊及蒸扇貝，亦一樣食出驚喜。初次見這粟米魚塊，肯定會「嘩嘩聲」，因為用上斤半重的沙巴龍躉，原條起肉香炸，更留下魚骨腩伴碟，有氣勢，粟米汁更特別用小木桶盛載，非常搶鏡！亦可自選其他靚魚炮製，豐儉尤人。蒸扇貝亦棄平凡的蒜蓉粉絲，改以自家製酒糟炮製，紅色賣相好意頭，更帶點點酒香！
嘗鮮之餘，亦可一試小菜，不乏新派滋味，像蜜糖山楂骨，山楂汁酸酸甜甜，好平衡豬腩排味道。新正頭更不妨柯打銅盤蒸滑雞，鮮雞塊夾着金華火腿、鮮淮山、紅棗及冬菇，味道具層次，即刻開懷大嚼。
勝記海鮮酒家
地址 : 西貢西貢大街 33-39 號
電話 : 2791 9887
(原文摘自《U Magazine》文：Pam、圖： Lam Lam、Kam、Keeyau、Sky、Suki)
