星級食家：山區麵包王
食家簡介：經常去山區工作，又鍾意食麵包，所以叫自己做山區麵包王。國內山區好多時真係無啖好食，所以出完差返哩，特別覺得晌香港真好，乜都有得食！更重要係，叫自己更珍惜每次飲飲食食，因為山區好多人都唔多夠食！
一心一意嚟品香試佢嘅招牌嘢，不過，有少少失望咁啦，可能期望大咗啩！佢係茶餐廳格局，左右兩排卡位，中間放圓枱，雖然唔算地踎嘅，但地方就稍為比較逼狹。7:30pm都未係好多人，但到咗8:00pm眨吓眼就差唔多爆晒場！叫咗4個菜：生沙龍鳳球（見都好多食評讚，所以一心一意走嚟試吓佢），仲有鍋貼小棠菜、西蘭花花枝帶子同琵琶豆腐，加埋個食晚飯就會送嘅例湯（但阿姐話送完就無喎）！
生沙龍鳳球
係將雞翼起骨，泡泡油加沙律醬兜炒，夏天食就幾好，酸酸哋夠醒胃，可以扒多兩碗飯添，而且大啖大啖肉，食得爽，頗出色！
鍋貼小棠菜
比想像之中無咁正，用蝦膠加埋刴碎嘅小棠菜做餡，搓壓扁成一大塊再沾上粉漿，然後底部加塊紫菜脆炸。咬落較為油膩，而且，蝦膠唔多彈牙，雖然有特色，但唔算好好食！
西蘭花花枝帶子，琵琶豆腐
算做得有水準嘅小菜，不過無乜驚喜。份量OK，所以，以咁嘅環境同服務，價錢都算係可以！
唯一出問題係計錯數，叫咗4個餸，加3碗靚仔，加埋一，收我成三百幾，查一查單原來計多咗1個餸同1碟通菜，認真誇張，都唔知有心定無意啦，但老闆二話不說say sorry之外，即刻重新計過張單，唔會向你問長問短，駁來駁去計錯個兩個菜係有叫定無叫，算加番啲印象分，所以，食乜都好，真係要睇單架，穩陣啲最好拎埋張底單走添！
用餐日期：2010年08月19日
食家評分：
味道***
服務***
環境***
價錢****
品香樓中西風味餐廳
地址：石硤尾南山邨南豐樓平台商場204-205平台, 210-213號平台
電話：2778-8791
