Day Time：掃街！
抵食！多款中式糕點 友和士多
坊間賣中式糕點嘅地方愈嚟愈少見，利東站 A 出口附近嘅友和士多就有勁多糕點賣，款式超多： 馬拉糕、砵仔糕、白糖糕、鬆糕、芝麻糕、煎堆、馬仔、茶粿等，放滿整個舖面！佢嘅糕點係自家出品，新鮮製作，好味之餘，有種住家感覺！
砵仔糕 $4、桂花糕 $4、煎堆 $6
砵仔糕係必食 item，口感軟糯，紅豆多兼有咬口，味道微微帶甜好天然，好食！桂花糕用晶瑩淡黃嘅大菜糕製，中間夾雜桂花和杞子，賣相好吸引。士多主要做街坊生意，一件糕幾蚊就有交易，我買砵仔糕 + 桂花糕 + 煎堆只係 $14，抵食。
友和士多
地址：鴨脷洲大街 110 號前舖
電話：從缺
營業時間：9am-7pm
【相關連結】 南港島綫遊 黃竹坑 3 大好 Hea 推薦
必試！超彈牙生菜魚肉 食記餐廳
「食記」，我相信大部分鴨脷洲人都幫襯過！小店賣 腸粉、炒麵、碗仔翅、炸燒賣、豆腐花等小食，sell 大件夾抵食，叫 2 至 3 款當 lunch 都夠飽。 街坊經過舖頭門前，都會坐底同店員姐姐講︰「唔該要碗生菜魚肉」！
生菜魚肉 $17（大）、$16（細）
生菜魚肉一定要試！生菜放底，魚肉多到幾乎滿瀉，魚肉入口非常彈牙有嚼勁，魚味亦突出。你仲可以「兩溝」，即碗仔翅 + 生菜魚肉，一碗食出兩種滋味。碗仔翅都足料㗎。
煎腸粉 $13（大）
食完碗仔翅魚肉肚皮仲有位，可以加多碟腸粉，有蒸有煎。
食記餐廳
地址：鴨脷洲大街 42 號
電話：從缺
營業時間：6:30am-6:30pm
平食 4 餸車仔麵 輝記車仔麵
除咗小食，中午到來可以食碗車仔麵，我嘅心水係輝記。入到去，開放式廚房，配料擺晒喺你面前，揀啱心水才落單都唔遲。如果有選擇困難症，牆上嘅 menu 都有幾款配搭可作參考。車仔麵唔算貴，$36 有 4 餸兼送埋汽水，好多學生哥幫襯㗎。
4 餸車仔麵 送汽水 $36
落單先點麵底（$7），有 河粉、米粉、米綫、粗麵、幼麵、油麵，可選嘅配料就多達 40 款，午餐肉魷魚紅腸魚蛋腸仔，仲有自家包餡嘅菜肉餃同真‧手打鯪魚肉，湯底可選腩汁或咖喱汁，好惹味！
輝記車仔麵
地址：鴨脷洲大街 57-63 號利是大廈地下
電話：從缺
營業時間：1130am-12mn
【落區掃食】 大埔延伸掃 太和 5 大心水食點
利東都有韓食小店 韓食味家
油塘街市嗰間隱世韓國小店 — 韓食味家，原來喺利東街市開咗分店！喺港鐵利東站 B 出口，沿住商場上街市就見。韓食味家主打外賣，利東店唔止賣炸雞、紫菜包飯，仲有炸醬麵、牛骨肉湯等，當正餐食都 ok！
3 點 3 下午茶時段去，學生們都點炸雞或買紫菜包飯。紫菜包飯一盒約 8 件，有蛋、青瓜、黃瓜同腸仔，好味！
炸雞 $38/ 盒、$20/ 串
不過最受歡迎嘅，依然係炸雞！即叫即炸，夠新鮮熱辣，炸粉薄而雞肉多汁，一盒 $38 有十多塊，裝到滿一滿，好抵呀！註︰如果點炸雞嘅人數多就要等一等，即叫即製嘛。
韓食味家
地址︰鴨脷洲利東邨道 5 號利東街市 91-93 號舖
電話：從缺
營業時間︰3pm-9pm
【海膽狂熱】 搶眼！性價比高！$98 原板海膽 Risotto
Night Time：平食海鮮
平食 3 道海鮮 澄海小館
愛食海鮮之人都會入鴨脷洲搵食，因為夠新鮮！喺呢度食海鮮，大家通常都會先去鴨脷洲街市，親手揀心水貨，再拿到附近的海鮮店加油料費自煮。我今日就買咗 扇貝、貴妃蚌各 1 斤，再加一份海中蝦，$165 咋！
買完海鮮，梗係即煮啦！街市附近嘅「澄海小館」，驟眼睇以為只賣潮州菜，原來歡迎買海鮮加工。可以按海鮮性質要求不同煮法，今日我就選要個蒜蓉蒸扇貝、豉油炒蝦，再嚟一道上湯貴妃蚌，色香味俱全！
上湯貴妃蚌
多數人會將貴妃蚌開邊用蒜蓉粉絲蒸，今次上湯煮貴妃蚌，唔使特別調味已經好有鮮味，貴妃蚌肥美大隻超鮮甜！上湯帶胡椒香，食完蚌肉再飲湯，盡嗒海鮮鮮味，好味！
豉油炒蝦碌、蒜蓉蒸扇貝
豉油炒蝦碌煎得香脆，連殼食埋都可以。1 斤扇貝有 4 隻，蒜蓉蒸扇貝嘅蒜油香同扇貝嘅鲜甜齊齊襲來，好惹味呀！不過就有少許乾身。2 人份嘅加工費先 $151，加埋海鮮，都係三百多元，都算抵啦！純粹個人經驗分享，海鮮愈多人食愈抵，一於約多幾個 frd 子嚟啦！
澄海小館
地址︰香港鴨脷洲大街 102 號
電話： 2553 3018
文︰Louise、攝︰Lok
【落區搵食】 跟住星星掃街！深水埗 3 大最正小食
【名人落區】 地膽糖妹帶路 掃深水埗心水小食
【掃街美食】 日賣 400隻！惹味 Shake Shake 雞翼
歡迎你 like 我哋 U Food Facebook Page / U Food Instagram ，取得我哋更新更快嘅資訊！
