要狂食日本菜，唔一定要食晚市放題嘅，早午餐都有選擇！好似「鳴門」呢個周末半自助午餐，僅僅推出咗兩個禮拜，反應不俗！入座起 90 分鐘內，客人可從 6 款主食中揀選 1 款，然後再「剔紙仔」order 十幾款刺身壽司及 3、4 款飲品！
採訪當日小編 book 咗中午 12 點，可能大家仲未起身，未算好多人！餐廳座位都幾寬敞鬆動，感覺 cozy，唔似一般嘅日式放題屋咁逼狹！而且仲有吧枱位，畀客人欣賞師傅手藝㖭！
識得揀，主食一定揀 招牌海膽丼，會跟 1 款小食及麵豉湯（可選湯烏冬），超豐富！呢間嘅海膽飯一向出名，好多食客都大讚海膽質素高，今次就等我試下味先！
【海膽狂熱】 北海道 + 加拿大 + 韓國 排隊平食三色海膽飯
海膽丼大約有半板海膽分量左右，都算揼本，配以紫菜、飯、番茄仔及 wasabi。海膽來自韓國，顏色偏淺黃，雖然點都不及北海道海膽咁好食，但食落都好鮮甜，仲帶少許甘味㖭！白飯口感煙韌，與鮮甜嘅海膽一齊食，very good！
香葱拖羅蓉丼
另一款主食選擇，有香葱拖羅蓉丼。魚味偏淡，色澤味道感覺不太新鮮，有點失望！主食另有吉列鹿兒島黑豚扒、安格斯金菇牛肉卷、大蝦天婦羅、牛肉野菜鍋可揀！
嚟到任食時間！刺身有 三文魚、油甘魚、八爪魚、鯛魚及 甜蝦 5 款選擇，都係大路款式，但睇落幾新鮮，而且師傅都幾手鬆，件件厚切！ 三文魚、油甘魚一定要無限追加，鮮美、厚肉，尤其是油甘魚，肉質軟腍不失彈性，帶濕潤，食到魚油脂香。
甜蝦 size 比想像中大隻，蝦肉彈牙又鮮甜！
八爪魚亦不錯，食落有咬口，又夠 juicy，點少少豉油 + wasabi，一流！
【精選放題】 板長搞放題！90 分鐘回本攻略
壽司有三文魚、劍魚腩、帆立貝、蟹籽、熟北寄貝及玉子 6 款。玉子較為乾身，無味；不過三文魚、帆立貝、熟北寄貝都值得追加！當然，有得揀，梗係食刺身好啲啦！
飲品選擇有： 巨峰乳酸特飲、白桃乳酸特飲、汽水及 橙汁 4 款，小編推介巨峰乳酸特飲，甜甜哋又不算多氣，個胃唔會頂住頂住，可以繼續食！
小評：
周日早午餐只有壽司刺身任食，沒有和食，選擇不夠豐富，但新鮮度搭夠。主食有齊香港人最 like 的海膽飯和香葱拖羅蓉飯，以 $188 位計算，食完大大碗丼飯再加任食刺身壽司，點計都算抵嘅。
周末半自助午餐
供應時間：逢星期六、日及公眾假期 12nn-2pm
價錢：成人 $188/ 位、小童（身高 120cm 以下） $98/ 位
註：入座時間起計 90 分鐘
鳴門割烹料理
地址：九龍灣宏照道 33 號國際交易中心 2 樓 2 號舖
電話：2796 7788
營業時間：星期一至五 11:30am-3pm、6pm-11pm；星期六、日及公眾假期 12nn-11pm
文、攝：Joyce
【今期必去】 西貢趁墟！廟會 12 大必掃小食
【零食放送】 少女心爆發！Lindt 限定粉紅朱古力
【甜品推介】 畀佢呃咗！「爽」字牌甜品
歡迎你 like 我哋 U Food Facebook Page / U Food Instagram ，取得我哋更新更快嘅資訊！
