完美飯焦 坤記煲仔小菜
以半炭爐方式炮製煲仔飯，煲仔飯上枱有陣陣炭燒香味，以炭火煲出來的米飯粒粒企身爽落，有不少名人如紅姑鍾楚紅都係捧場客。採訪當日，就見到方力申同朋友一齊嚟開餐，他表示一得閒就會嚟食，最鍾意就是可以成塊剷起的飯焦，每次來到必食臘味雞飯。溫馨提示，去之先訂位，否則只能在 9:30 pm 後才能 walk in！
臘腸排骨飯 $80
一打開蓋已聞到臘腸香，排骨醃得入味，亦唔會過熟變嚡；對好多人嚟講，煲仔飯最緊要係食飯焦，這裏的飯焦同小方講的一樣可以成塊起，最讚最讚的係飯焦脆之餘，連丁點苦味都無，超正！
窩蛋牛肉飯 $78
淋上豉油、配上蛋白呈半熟狀態的窩蛋，睇落好吸引，加上嫩滑牛肉，食時再將蛋搗爛令蛋汁包住每粒飯，好好味。
坤記煲仔小菜
地址：西環皇后大道西 263 號和益大廈地下
電話：2803 7209
營業時間：星期一至六 11am-12:30pm，星期日 6pm–12mn
茶記格局靚煲仔 添樂園
位於九龍城的添樂園，茶記格局，但最出名係煲仔飯。好多人嚟幫襯，都係為煲仔飯。好味秘技是於飯煮好後，用匙羹將 6、7 成熟的米飯攪拌，煲邊飯焦唔會過乾。而除了煲仔飯外，添樂園更有其他粥麵飯類，選擇非常多。
鹹魚肉片飯 $59
肉片的厚薄及生熟程度剛好，食落不會過乾，仲有肉汁，肉片下就是大大塊的鹹魚，鹹魚甘香不死鹹，而且滲進肉片及飯中，唔使加豉油都夠味。
北菇滑雞飯 $53
雞肉既嫩且鮮又夠滑，最讚是冬菇雖然只有一隻，但非常厚實，食落仲好香；最正係每粒飯都充滿雞油香味。
添樂園
地址：九龍城福佬村道 4 號地下
電話：2382 2369
營業時間：7am-2am
【相關報導】
大過塊 Mask！足 3 兩花膠肉餅飯
焗爐烘出飯香 永合成
喺上環已有 40 多年歷史的「永合成」，雖然而家搬咗去西環，地方仲細咗，但仍有不少熟客去幫襯。想食的話記得 3 點前去，因為過咗呢個時間大部分受歡迎的煲仔飯都會賣晒。煲仔飯最特別之處係以焗爐烘煮，透過四方八面的熱力逼出飯香，飯底以無飯焦見稱，招牌煲有窩蛋牛肉飯，用最頂級的泰國絲苗米，亦堅持每朝到街市買新鮮黃牛肉，至於臘腸、膶腸也是海味街相熟老字號交來，用料好精。
黃鱔煲仔飯 $80
要到冬天先有得食，黃鱔由老闆親自到街市買，所以未必日日有，食唔食到要睇緣份。黃鱔落單後活劏，調味後連同米飯同焗，鱔肉汁鮮味融入米飯內，鮮味無窮。
手剁窩蛋牛肉飯 $65
貫徹生米煮成熟飯，在西式焗爐以對恆原理，把米飯與炒香的牛肉焗至僅熟，過程沒有直接受火，肉汁與米香能百分百保留，牛肉入口 juicy，配上粒粒分明散發光澤的米飯，高水準。
永合成馳名煲仔飯
地址：西營盤德輔道西 360 號地舖
電話：2850 5723
營業時間：星期一至六 7am-4pm，星期日及公眾假期休息
創意澎湃 绍華
創意煲仔飯之選，選料以西式材料和調味為主，像牛頸脊、羊髀肉、鵝肝等，而海鮮類如帆立貝、象拔蚌、龍蝦等，喺度都可以變成煲仔飯材料！新鮮感滿滿，好多年輕人捧場。
野菌鵝肝煲仔飯 $72
鵝肝有油香，把鵝肝炸成粒狀，加入炒香的雞髀菇、秀珍菇、鮮冬菇、靈芝菇等，每粒飯都有菌香和鵝油香，有新意得來卻不標奇立異，試得過！
豉汁帆立貝象拔蚌煲仔飯 $72
飯身軟硬乾濕剛剛好，把連殼帆立貝和象拔蚌放上飯面焗，上枱前，才把調好味的豉汁淋在連殼帆立貝和象拔蚌上，吃起來活像清蒸海鮮。
绍華小廚
地址：筲箕灣愛秩序灣愛東邨熟食中心 CF3 店
電話：8199 8188
營業時間：7am-10pm
文、部分攝影：Froggie
【相關報導】
至好味 4 大 「佬」飯推介
歡迎你 like 我哋 U Food Facebook Page / U Food Instagram ，取得我哋更新更快嘅資訊！
