呢個結集古早跟現代，又中又西嘅腐乳蛋白西多士，出自鯉魚門一間開業接近 50 年的銀龍咖啡茶座，唔怪得有個咁懷舊嘅小食啦！
牆上的介紹好搞鬼！包括「味道意想不到」和「人生可以愛錯，豈能錯過！」咁話！介紹上有大孖醬園腐乳的照片，如果真係用「大孖」做，真係有誠意喎！
腐乳蛋白西多士 $20
西多士即點即煎，上枱時仲吱吱聲！比一般西多士薄少少，賣相差不多，但係煎唔係炸，屬正宗做法，沾上蛋白煎至金黃顏色，點睇都吸引。
切開一刻，即時聞到腐乳味！以為中間會有腐乳湧出嚟？無喎！直到揭開麵包後才發現只有薄薄一層腐乳。不過，薄薄一層唔代表唔夠味，食落腐乳味好出，唔單止唔太鹹，鹹得來仲有少少甜，味道好過癮！雖然店內有煉奶提供，但建議就咁食，因為加咗反而味道反而唔夠分明。
羅漢果茶 $15
由店內接近 80 歲的婆婆笑住極力推介。以低溫烘焙羅漢果製成，保留到箇中好多養分。即使係凍飲都聞到陣陣羅漢果香，入口清甜帶甘，飲完即時覺得喉嚨好舒服。秋天飲都幾潤！
銀龍咖啡茶座
地址：鯉魚門鯉魚門海傍道中 31 號地下 B 號鋪
電話：2348 0711
營業時間：9:30am - 4pm
文、攝：Froggie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
