這間丼飯專門店叫「爆丼屋」，裝修睇落一啲都唔似日本餐廳，灰色牆身配深啡色桌椅，感覺有啲工業 feel。主打的是爆丼，意思即是款款都是料多過飯，原來日本東京現時好流行呢種只見材料不見飯的丼！餐廳供應 10 款丼飯，無論是海膽、甜蝦、鰻魚……都係足晒料，呢種咁誇張的丼飯，啱晒相機食先的香港人！
爆盛慢燒牛肉丼 $128 /230g (small)、$188 /400g (mega)
丼飯店主打的竟然唔係刺身海鮮丼，而係牛肉丼！做得鎮店之寶梗係唔係普通貨色，這個「爆盛慢燒牛肉丼」，單是飯已經有 300 克，鋪上足足 400 克新西蘭西冷，成個飯有成 20 cm 高，好誇張！不過，丼飯全部都是牛肉，食到一半都已經好飽，一個人真係食唔晒，最好搵多個朋友 share 啦！
原來行政總廚師傅趙宗明（Tony）曾於半島酒店工作，因此呢個牛丼的製作一啲都唔求其。西冷以蒜、西芹、紅蘿蔔等 4-5 種食材醃一晚，牛肉表面煎香後，放焗爐以高火烤 15 分鐘，再轉攝氏 85 度焗 40 分鐘，最後再閂火焗 20 分鐘。
Mega 版牛肉丼足足有 400g 牛肉片，牛肉味道唔算好濃郁，但肉質好軟腍。
牛肉分了 3 層鋪上，中間淋上秘製蒜香燒汁，亦可引出牛肉香味又可增添濕潤感。
鋪好牛肉， 再於牛肉片表面淋自製山葵忌廉汁。Tony 話日本人食牛，傳統上會夾 wasabi 一齊食，來到香港再加少少變化，製成忌廉汁，wasabi 唔太嗆、忌廉汁 creamy 又可以令牛肉口感更加滑。
四重火山盛丼 $298
無刺身不歡的，推介呢個全店最豐富嘅「四重海鮮丼」。海鮮丼蹏醋飯用咗北海道七星米，飯粒飽滿又有飯香。丼飯中間有一大堆拖羅蓉，入面混入了甜蝦、劍魚腩、帆立貝、赤身、紋甲魷魚、三文魚子及柚子皮，再加大量三文魚子、加拿大海膽及松葉蟹肉，真係堆到成座山咁高！
極上拖羅盛丼 $228
飯面鋪上 10 片厚切大拖羅片，拖羅片令立立，油潤有光澤！食落入口即融，頓時滿口魚油香。
三色海膽盛丼 $238
海膽迷不容錯過！丼飯鋪滿北海道馬糞海膽、加拿大海膽及韓國紫海膽，每種海膽都佔 1/3。北海道馬糞海膽味道最鮮甜又 creamy、加拿大海膽大片又厚身，韓國紫海膽會略經火炙，帶有焦香味，一碗丼試勻 3 地海膽滋味！
巴馬火腿、海膽盛撈烏冬 $168
Tony 考慮到旺角年輕人多，所以加入西日元素。撈烏冬賣相好西式，加拿大海膽及巴馬火腿各佔一半。
烏冬先用秘製醬汁拌勻，用鹹香的巴馬火腿捲起海膽一齊食，估唔到又好夾！
九州燒芝士魚餅 $35
想叫多個小食，推介呢個芝士魚餅，魚餅入面內藏芝士，將魚餅燒香後一咬，芝士有流心效果！
玉子明太子燒 $35
甜甜哋嘅玉子燒面加咗明太子醬，食落好惹味。
爆丼屋
地址：旺角豉油街 50 號地下 8 號舖
電話：2332 2918
營業時間：12nn-2am
文：Jessie、攝：Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
