大閘蟹季節，好多大酒店都做緊大閘蟹套餐，埋單四五百起跳。今次試食的「上海新大眾大閘蟹專門店」，任食大閘蟹價錢按蟹的大小分成 3 級，好均真。最低門檻二百多元，可怒食 75 分鐘，喺市場上唔係最平，勝在用料好。用太湖大閘蟹，每隻約 3-4 兩，仲可以揀蟹公或蟹乸，雖然屬細蟹，但拎上手足秤，掰開蟹身仲見有一定分量的蟹黃，橙橙黃黃質感 creamy，蟹膏多定少隻隻唔同，睇你彩數喇！
收費按蟹的大小分成 3 級，均真！
以點餐紙落 order，方便易明，邊吃邊點，爭取時間！
今次試食 $268/ 位的套餐，以點餐紙落單，每人每次限 order 兩隻蟹，雖然寫明等候時間大概要 10 分鐘，但平均 5 分鐘已經有蟹上枱，快！我計過，時限內至少食到 6 至 8 隻。相比之下，蟹公膏較多，但蟹乸肉質比較彈牙有蟹味。
任食大閘蟹，蟹的 size 預咗細，但隻隻蟹都有相當分量蟹膏，呈橙黃色，口感 creamy 帶甘香。
蟹身有巴掌大，蟹公大概 3 兩半至 4 兩，蟹乸大概重 3 兩，拎上手都幾足秤。
除了大閘蟹，任食的另一亮點係有很多蟹粉菜，必食推介有大閘蟹粥，每碗都有原隻大閘蟹，粥底幾綿又有蟹味；蟹膏臘味糯米飯，外表睇落平平無奇，但糯米夠腍糯，臘味足料而且食到粒粒蟹膏，如果覺得滯，飲番杯薑茶再作戰！
大閘蟹以外，仲有蟹粉扒時蔬、蟹粉水餃，必食推介有生滾大閘蟹粥，每碗都有原隻大閘蟹，粥夠綿有蟹味。蟹膏臘味糯米飯食到粒粒蟹膏。
汽水薑茶連薑茶丸子都係任飲，加多 $48（每位）連陳年花雕都任飲唔嬲（觀塘及石硤尾分店除外）。
上海新大眾大閘蟹專門店除咗搞咗個「大閘蟹小姐」選舉外，最近又有新 gimmick，就係 $68 任食大閘蟹！任食 item 同 $268/ 位的一樣，每日在旗下 5 間分店進行，5 間分店名額共 100 個，每日下午 5 點開始派籌，1 人限 1 籌，先到先得。食平嘢，總要付出代價，平成二百蚊喎，抵排啦！
詳情請瀏覽 facebook 專頁：https://www.facebook.com/Suntaichung
上海新大眾 大閘蟹專門店
地址：黃大仙飛鳯街 46 號地舖（另土瓜灣、石硤尾邨、觀塘、元朗設分店）
訂座電話：2419 1208
營業時間：6pm-1am
收費：
1 大湖約 3 兩半至 4 兩大閘蟹公 + 太湖約 3 兩蟹乸，10pm 前成人 $268/ 位、小童 $128/ 位；10pm 後成人 $248/位、小童 $108/ 位
2 太湖約 4 兩半至 5 兩大閘蟹公 + 3 兩半蟹乸，10pm 前成人 $348/ 位、小童 $248/ 位；10pm 後成人 $318/ 位、小童 $228/ 位
3 太湖約 5 兩半至 6 兩大閘蟹公 + 4 兩蟹乸，10pm 前成人 $528/ 位、小童 $388/ 位；10pm後成人 $488/ 、小童 $338/ 位
註：任食限時 75 分鐘，包括大閘蟹和前菜菜式、薑茶小丸子、薑茶和汽水，設加一。
文、攝：Theo
歡迎你 like 我哋 U Food Facebook Page / U Food Instagram ，取得我哋更新更快嘅資訊！
