呢個咁有創意嘅甜品，估唔到喺南山邨冬菇亭搵到，呢間叫「糖室」嘅甜品店，可能見秋意漸濃，最近推出咗呢個鐵鍋棉花糖吐司。最大賣點係即點即製，焗完仲用鐵鍋原鍋上枱，so warm！
鐵鍋棉花糖吐司 $56
呢底棉花糖吐司賣相滿分，粒粒棉花糖嘅表面焗到金黃色，上面放粟米脆片、水果，仲有一球呍呢嗱雪糕，好大堆頭！
棉花糖下面鋪滿吐司粒，吐司粒焗得香脆，連埋棉花糖食，一軟一脆，口感好得意！味道亦好夾，甜到漏兼夠香口，非常邪惡﹗
焗得微脆帶焦嘅棉花糖，外面脆脆哋，內裏軟綿綿，仲可以拉絲㖭㗎！係食落有啲黐牙啫。
將棉花糖吐司粒 + 水果一齊食，藍莓和士多啤梨酸酸甜甜，有果汁中和，清新啲。小記覺得唔加粟米脆片都好好食。
我喺無食晚餐嘅情況下獨自挑戰呢個棉花糖吐司，食到一半就投降，建議你孖住幾個朋友 share 食最好。
糖室而家做緊 happy hour，喺 6pm-8pm 食全單 7 折，個鐵鍋棉花糖吐司原價 $56，折後 $39 埋單，抵。
Chillazy Dessert 糖室
地址：石硤尾南山邨商場平台熟食亭 C4 號
電話：5260 8053
營業時間：星期日至四 3pm-12am，星期五、六及公眾假期前夕 3pm-1am
文、攝︰Louise
歡迎你 like 我哋 U Food Facebook Page / U Food Instagram ，取得我哋更新更快嘅資訊！
