雪糕係要 never eat alone，店主找嚟好多雪糕伴侶陪反轉雪糕闖蕩天涯，愈望佢，愈覺得有種魔力引你開口大啖咬，學Sammi 話齋：好邪啊！
要我形容呢杯雪糕，我會話：媲美比薩斜塔嘅形態，擁有一種巴黎鐵塔反轉再反轉嘅不羈，又有啲黑武士嘅邪氣，顏值超高。原來呢個美男子嘅出現係一場美麗嘅錯誤，話說老闆 Elvis 開店前錯訂了小幾號嘅雪糕筒，雪糕頭重腳輕，食落唔方便，他嬲嬲地將大頭雪糕 180 ℃ 倒轉，平凡嘅雪糕錯有錯着世紀大變身，吸睛度大增。
樣靚大家有眼睇啦，內涵我而家講，老闆一向對乳酪雪糕情有獨鍾，前幾年在九龍灣開個乳酪專門店，鍾意為 fro-yo 整色整水，又鍾意研究新口味，最招牌曾做出一杯海水味嘅藍色 fro-yo，堪稱一代 fro-yo 達人。Fro-yo 要有乳酪味先叫 fro-yo，達人用上酸度高嘅韓國乳酪粉，加上 creamy 又 milky 嘅德國奶做，因為店內每款甜品都配乳酪雪糕，fro-yo 甜度比以往做雪糕店時略略調低了，加埋心太軟或窩夫等甜品一齊食都不會太甜膩。
今次開店，老闆當然將撚手嘢一推再推，之前出過一杯 ig 洗版的仙人掌果雪糕，fancy 又 girly，但今次又徹底崩壞雪糕純情形象，以竹炭粉加埋青蘋果做暗黑系 fro-yo，配搭咗全黑嘅窩夫、黑色柳丁心太軟照顧男性用戶。這裏嘅 fro-yo 仲令人充滿期待，唔計仙人掌果啦，等我數數以前出過嘅奇特口味先，有荔枝玫瑰、海鹽、桂花、蔓越莓、茉莉茶......，富冒險精神嘅雪糕妹雪糕仔，真係要輪住嚟試。
黑色柳丁心太軟配乳酪雪糕 $40（期間限定）
黑色雪糕其實是青蘋果味，加了竹炭粉做，橙味朱古力加上竹炭粉做心太軟，裏面是橙味朱古力漿，上枱已有大朕橙香味飄埋嚟，蛋糕部分香軟唔嚡口，入口好似吃加強版的 Jacob's 橙餅。
荔枝玫瑰莓心配乳酪雪糕 $48
雪糕是原味乳酪，心太軟是玫瑰味，流心是玫瑰醬，流得十分澎湃，上面撒了點玫瑰花瓣，顏值超高。
蜂蜜童真彩虹脆脆奶香窩夫配乳酪雪糕 $58
窩夫即叫即製，最得意是奶香味突出，前面 3 種咁 colorful 的分別是紅莓白朱古力、開心果及檸檬蛋白醬，另配海鹽焦糖脆脆。
荔枝玫瑰醬芭菲杯 $45
原味乳酪酸度比甜度高，感覺醒神，配上甜甜的玫瑰花醬，加埋荔枝果肉，十分清新。
草莓香蕉乳酪沙冰 $36
以新鮮士多啤梨及香蕉加成沙冰，上面再唧上竹炭青蘋果雪糕，果味十足，是清新之選。
黑朱古力乳酪沙冰 $34
沙冰以美國名牌 Hersley's 朱古力加上可可粉、竹炭粉及少量牛奶打成，朱古力甘味及甜味適中，配原味乳酪雪糕。
舖頭面積不大，但老闆陳生堅持自家乳酪。
想甜嚐甜
地址：黃大仙蒲崗村道 73 號富佑大廈地舖
電話：3956 4744
營業時間：1pm - 12mn
收費：只收現金，不設加一
交通：於黃大仙地鐵站乘 3C 或 2F巴士，於富佑大廈下車，步行 1 分鐘
泊車：鳳德商場 $22 hr
平均消費：$40
原文摘自 U Magazine ISSUE 564
歡迎你 like 我哋 U Food Facebook Page / U Food Instagram ，取得我哋更新更快嘅資訊！
