呢個就係本地甜品店松記糖水推出嘅全新「蜜之戀人」！嘩！個名好浪漫呀，即刻吸引到港女小記入去食！
蜜之戀人 $69
戀人出場喇！目測蜜瓜多過半個，比起日韓代表仲要足料！店方無特別表明用咗咩國家出產嘅蜜瓜，淨係話唔靚唔用、唔熟唔食！蜜之戀人賣相都幾靚仔，蜜瓜打橫切開後，有一球雪糕放中間，旁邊圍滿蜜瓜波波。
青綠色嘅蜜瓜波波，味道清甜有瓜味。一口一粒，食得一啲都唔狼狽。中間的雪糕球味道可以自己揀，小記覺得呍呢嗱曲奇味雪糕，唔會搶走蜜瓜香。
食晒頂層嘅雪糕及蜜瓜，見到入面放咩喇！原來甜品師將蜜瓜挖空中心後，放入爽彈嘅水晶粉條。不過水晶粉條無乜味道，建議大家留少少雪糕伴食！
仲有其他嘢食㗎，係細細粒嘅椰果！爽彈又帶點煙韌，可以豐富口感。唔好掛住食配料呀！記得要掘埋啲蜜瓜肉食，蜜瓜雖然唔係爆汁，但好甜好香蜜瓜味。果然係揀過夠熟夠甜先畀客人，讚！
松記糖水店
地址：深水埗元州街 162-188 號天悅廣場 CB3 舖
電話：2387 7819
營業時間：2pm-1:30am
文、攝：Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
