最香滑最有分量 llaollao
來自西班牙的 llaollao，於全球擁有超過 100 間分店，亞洲區足迹遍布日本、台灣、新加坡及馬來西亞，今年 6 月喺旺角落腳後都唔夠兩個月，又再於銅鑼灣開分店。乳酪店的 frozen yogurt 沿用西班牙配方，以脫脂奶每日即製，新鮮又健康。最吸引嘅是招牌的 7 層乳酪芭菲，堆到成座小山丘咁，食一杯可以當正餐！
7 層乳酪芭菲（西瓜、芒果、奇異果配黑朱古力醬） $49
拼一拼：
乳酪：Frozen yogurt 用咗西班牙總店的配方，每日用脫脂奶加乳酪粉於店內即製。乳酪味道帶微酸、不太甜，而且奶味比較重，質感香滑 creamy，食一杯真係幾飽肚。
配料：配料多達 20 多款，大部分由西班牙入口，topping 細分成脆脆（crunch）及新鮮生果兩類。單是 Crunch 就有 6 款選擇，包括焦糖餅碎、Oreo、朱古力脆波、杏仁碎、白朱古力碎等。而生果類 topping 則用本地貨，款式按時令而變更，夏天就有士多啤梨、香蕉、奇異果、芒果、哈密瓜等，每日至少 8 款。
醬料：淋在乳酪上面的醬汁都有分朱古力及生果味兩類，有人氣 No.1 嘅焦糖餅乾、西班牙黑朱古力、榛子朱古力、白朱古力、白朱古力威化餅碎。生果味則有青蘋果、雜莓、熱情果及芒果等，全部由西班牙空運直送，食到當地風味。
分量：杯裝乳酪有大（$49）、中（$39）、小（$29）及純乳酪（$19）4 個 size，每款都可以揀 1 至 3 款 topping。最多人選擇的 7 層乳酪芭菲底層有 3 圈乳酪，中間一層可以揀 3 款水果、2 款果仁及一款醬料，然後再加 3 圈乳酪及淋上兩匙醬料，大堆頭！
llaollao
地址：旺角豉油街 33 號地下 B 舖
電話：從缺
營業時間：12nn-11pm
Toppings 同分店最多 Yo Mama
鍾意食乳酪的朋友仔，一定食過 Yo Mama 出品。呢間來自意大利的乳酪店，以低脂、低卡路里、高鈣，以及獨家的益生菌作賣點，怕肥的你食咗都無咁有罪惡感。而且勝在多分店，中環 IFC、銅鑼灣皇室堡、灣仔、太古城、又一城等共 5 間分店，好方便。
乳酪（普通，加一款 topping） $37
拼一拼：
乳酪：以低脂、加鈣、含抗氧化物及以使用益生菌製作為買點，用上全天然的材料，好健康。乳酪有原味及綠茶兩種口味，另外又會不定時推出如菠蘿、Tiramisu、檸檬撻、Mojito等新口味。原味乳酪奶香十足，酸度溫和唔太搶，質地厚軟 creamy。
配料：睇吓 menu 個 toppings list 就嚇親，配料差唔多有 30 款任揀！可以分成新鮮生果、Sweet、Cereals、Syrup-y Fruit 等 5 大類。新鮮生果會有藍莓、香蕉、芒果，Sweet 的選擇是消化餅、熊仔軟糖、Oreo 碎、碎朱古力、朱古力彩針等。想增加脆口感，可以揀有可可球、甜粟米片、燕麥及小麥胚芽的 Cereals 系列。仲有椰果、蘆薈、Mochi 麻糬粒、黑糖寒天、芒果味爆爆球珠選擇，簡直是花多眼亂！
醬料：醬料都有 5 款畀你揀，有蜜糖、朱古力、脆皮朱古力及煉奶，味道為無乜特別，都是常見的選擇。
分量：分咗普通（$31/150g）、大（$38/200g）、Waffle Cone（$38/200g）3 個選擇，每款Size 配 1 款配料，想再加就要畀多 $6，逐款計錢，乜都想試嘅朋友揀多 2 至 3款隨時 $50落樓，都幾貴！另外仲有 5 層芭菲杯（$45）或 6 層芭菲杯（$50）選擇，分別可選 2-3 款 toppings。
Yo Mama
地址：銅鑼灣告士打道311號皇室堡4樓404號舖
營業時間：11:30am-10:30pm
電話：2545 3999
自己 topping 自己加 My Star Yogurt
葵廣 2 樓嘅全新小食街都開咗間乳酪店！呢間乳酪店嘅老闆係一位 24 歲嘅少女！首次創業嘅 Cindy，原本是個無乳酪不歡嘅 OL。既然咁愛乳酪，於是自己開舖，鍾意幾時食、食幾多都得！
拼一拼：
乳酪： Froyo 用咗新鮮乳酪加全脂牛奶製作，質地稠密厚身，但帶有少許冰感，略嫌不夠滑。Cindy 特意將乳酪的酸味減低，即使配士多啤梨及奇異果等帶酸的生果，都唔會酸到震，好細心！
配料：配料選擇都唔少，有士多啤梨、奇異果、哈密瓜、芒果得新鮮生果之外，仲有芒果、提子、荔枝等口味的椰果粒及爆爆珠。要脆口的 topping 都有，粟米片、朱古力波、M&M’s、棉花糖等，總共 24 款配料任揀。推介由韓國入口的麻糬粒，咬落煙韌又唔太甜。
醬料：有士多啤梨、朱古力及蜜糖 3 款選擇。
（前）細乳酪杯、（後）大乳酪杯 $19/100g
分量：有大、細兩個 size，分別約有 220 克及 150 克，拎上手都幾有分量。舖頭有自助topping 吧，畀客人自己落手自己揀自己加，想食乜、邊款要多啲、邊款想試味淨係食一粒都得。揀完所有配料就可以拎到過磅，$19/100 克，食平啲定食豪啲自己話晒事。
My Star Yogurt
地址：葵涌廣場 2 樓號 2013 舖
電話：從缺
營業時間：12nn-10pm
文：jessie、攝：jay、ki
歡迎你 like 我哋 U Food Facebook Page / U Food Instagram ，取得我哋更新更快嘅資訊！
