打風必備 no.1：午餐肉
食開有感情！白豬仔午餐肉要買港版
昋港人最熟悉、最有親切感嘅午餐肉，一定係罐身有隻「白豬仔」嘅長城牌或梅林牌午餐肉，閒閒哋食咗幾十年！原來長城牌出品唔係叫午餐肉，係叫「火腿豬肉」，成份除了豬肉外，還有火腿粒，煎香後望落有絲絲紅肉條，味道及賣相都好有層次，餐肉味夠濃之餘，仲滲出點點火腿鹹味。咁多年價錢都係 $20 樓下，性價比極高，難怪多年來都深得我哋歡心。不過，要留意餐肉是香港版還是內地版，小記在超市購買的是港版「金龍食品貿易有限公司」代理，火腿分量較多，香味較濃，味道勝一籌㗎！
長城牌火腿豬肉 340g $18.9（惠康）
韓風餐肉大熱！小編推介清淨園
近年飲食界韓風吹不停，連超市架上都多咗好多韓國午餐肉！小編哈韓，試過唔少韓國午餐肉，清淨園出品係我心水推介。午餐肉主要採用純優質豬肉製造，不含雞肉；可能用全豬肉關係，午餐肉顏色較淺，有肉香得來，唔似一般午餐肉咁鹹，咬落肉質實淨，值得一試。
清淨園午餐肉 190g $24.9（一田）
當地熱選 三祖午餐肉
再嚟韓國代表！三祖係韓國家傳戶曉嘅餐肉品牌，添加了雞肉及豬肉炮製，比例約為 57% 及 27%，真正 made in Korea，用韓國豬肉，不含防腐劑、添加劑及色素，食用都放心啲。
三祖午餐肉 200g $22（一田）
辣味！Moguchon 韓國午餐肉
大韓民族都係喜歡辛辣，呢款同樣用韓國豬肉做嘅午餐肉，就混合了大蒜粉、乾薑粉、甘草粉及乾辣調味，香料味濃，惹味帶辣；餐肉脂肪少，味道和質感都似火腿。
Moguchon 韓國午餐肉 200g $26.9（一田）
外國餐肉勢力！健康低鹽之選 Spam
我知餐肉唔健康，但邪惡嘅味道實在難以抵擋！如果你注重健康，推介你揀 SPAM 火腿餐肉，與白豬仔一樣都係採用豬肉及火腿製造，但招紙標明少用 50% 鹽份，感覺較健康。罐頭仲寫明其實餐肉本身已煮熟，懶人嫌麻煩可以立即凍食㗎！小編堅懶，會將餐肉直接喺熱飯上面食，讓飯嘅熱力將餐肉油脂逼融，香味隨煙散發，十級邪惡！
SPAM 火腿午餐肉 198g $24.5（惠康）
打風必備 no.2：豆豉鯪魚
豆豉鯪魚又係送飯好 partner！不過去年有報道指某些品牌含有孔雀石綠。豆豉鯪魚選擇唔多，除咗珠江橋牌，小編有另一推介，就係「金龍牌」，打開罐即刻有濃濃豆豉味湧出嚟，好足料！鯪魚嘅分量又多，魚肉厚身，咬口十足，而且甘香，平日用嚟炒油麥菜，打風就可以就咁送飯或夾麵包！
金龍牌豆豉鯪魚 184g $13.9 （一田）
打風必備 no.3：五香肉丁
如果打風嘅命運係食即食麵，我一定要開罐五香肉丁！送湯麵又得，撈即食麵亦得，得咗！超市有好多隻牌子嘅五香肉丁，以天龍牌及古龍牌最常見，小記就買咗現場價錢最高、搶剩一罐嘅古龍牌，整返個頹麵餐。果然，質素有保證喎！肉丁粒粒原整，唔會碎濕濕，肉質結實唔霉，充滿辣香之餘不失肉香，good choice！
古龍牌五香肉丁 142g $17.9（惠康）
打風必備 no.4：沙甸魚
除咗豆豉鯪魚，罐頭沙甸魚亦深受歡迎！喺超市成日見到嘅「葡國老人牌」包裝沙甸魚，有紅、黃、橙和金等不同顏色，代表不同味道選擇，紅色係辣油，黃色係橄欖油浸，橙色係辣味茄汁，至於金色則是植物油浸沙甸魚。小記揀咗黃罐嘅油浸沙甸魚，裏面有一條完整嘅沙甸魚，味道甘香，肉質結實，最讚係唔腥，已切開三份，方便即食。
葡國老人油浸沙甸魚 $16.9（一田）
銷售點：
一田
電話：3761 1388
惠康
電話：2299 1133
文：Celia、攝：Keeyau
歡迎你 like 我哋 U Food Facebook Page / U Food Instagram ，取得我哋更新更快嘅資訊！
