今次 759 阿信屋引入嘅復古家電系列係 Nostalgia Electrics 出品，呢個叫 Retro Series 嘅系列，用咗復古紅色配襯銀色綫條，靈感係嚟自美國 50 年代的車和賣漢堡包的美式 diners counter，
家電設計用咗復古紅色配銀色綫條，復古得來感覺型格。Retro Series 有一系列小家電，包括棉花糖機、冬甩機、爆谷機、烤香腸機等，小編就最喜歡呢款彈出式熱夠烤爐！
彈出！好玩熱狗烤爐
呢部懷舊熱狗機，啱晒又想食熱狗又怕麻煩嘅懶人，一部機可一次過處理 2 條香腸和 2 片麵包！原理好似多士爐咁，將香腸和麵包插進坑糟中，按喜好需要調校烘烤時間，鍾意燶啲脆啲，可烤耐少少，烤好腸仔同麵包都會好似多士咁彈出嚟！好好玩！機底有碎屑盤，方便清洗；跟機仲送熱狗勾夾㖭！
彈出式熱狗烤爐
產品尺寸：(L) 10.25 X (W) 5.25 X (H) 7.75
重量：1.55 KG
價錢：$398
小朋友最 like！棉花糖機
小朋友開生日派對，棉花糖機一定係全場焦點！加埋復古款式，感覺更有氣氛！好似舊時嘅遊樂場咁！呢部機操作好簡單，只需倒入砂糖開動，一絲絲棉花糖就會走出嚟，捲起佢即成夢幻雲朵！跟機送埋透明藍罩、砂糖勺以及兩種顏色嘅棉花糖棒，開箱即玩！
金屬紅復古棉花糖機
產品尺寸：31X31X31 cm
重量：2.4 KG
功率：450W
價錢：$558
品牌皇牌爆谷機
爆谷機係品牌中嘅皇牌產品！呢款爆谷機特別採用球形設計，夠晒 eye-catching，操作亦相當簡單，只要在當中加入粟米粒、糖、油後再開機，爆谷機會自動攪拌，粟米粒隨時間會爆開變成香脆美味嘅爆谷，而且唔會「黐底」，方便兼乾手淨腳。
攪拌式爆谷機
產品尺寸：(L) 13.5 X (W) 11.25 X (H) 10.5
重量：2.6 KG
功率：1000W
價錢：$598
碌碌碌！熱狗腸機
經常喺戲院小食部見到呢部熱狗腸機，上面啲熱狗腸轉轉轉，香噴噴好吸引！小編都有種手痕嘅感覺（Buddy，你懂的！），而家真係有部熱狗腸機可以買番屋企。機身小巧，放喺餐枱上都不太佔位置，上蓋具保溫功能，並可調節溫度，可一次過烤 8 條普通尺寸嘅熱狗腸或 4 條超長熱狗腸，夠方便快捷，party 必備！
金屬紅熱狗腸機
產品尺寸：(L) 14.4 X (W) 7.8 X (H) 14
重量：3 KG
功率：280W
價錢：$658
Cute！DIY 迷你甜甜圈
女生見到一定喜歡！甜甜圈機好似 suitcase 咁細細部，好慳位！每次可做 6 個迷你甜甜圈，而且烤盤有不黏塗層，清洗起嚟很方便。
復古迷你甜甜圈機
產品尺寸：(L) 9.84 X (W) 7.48 X (H) 3.46
重量：2.2 KG
功率：750W
價錢：$398
熱賣多士爐
品牌熱賣產品，一年銷量可達 100 萬部！每次可整 2 片方形多士或 bagel，並可自行調節烘焙時間。底盤亦有碎屑盤，易於清洗。型格嘅金屬紅色，搶眼！
金屬紅多士爐
產品尺寸：(L) 11 X (W) 5.75 X (H) 8
重量：1.75 KG
價錢：$398
少見！紅色多功能微波爐
微波爐並非新奇嘢，不過呢部微波爐嘅 design 充滿 50 年代嘅經典復古風格，擺一部喺屋企即時增加幾分「潮」味！25 公升大容量、12 種烹調模式、5 種火力選擇，還有預設定時開機功能，操行起嚟簡單易用！跟機送玻璃轉盤！
懷舊式微波爐
產品尺寸：48.3 X 35.6 X 28 CM
重量：13.95 KG
功率：800W
價錢：$2,298
759 阿信屋家品市場
地址：北角英皇道 560 號健威坊 UG 樓 U41號
電話：2412 7321
營業時間：11am-9pm
註：中環域多利皇后街店、大埔超級城店、紅磡昇御門店、元朗合益店、沙田瀝源商場、九龍灣 E-MAX 店、將軍澳新都城一期店、美乎曼克頓山店、荃灣千色匯店亦有發售
文：Joyce、圖片來源：互聯網
歡迎你 like 我哋 U Food Facebook Page / U Food Instagram ，取得我哋更新更快嘅資訊！
