餐廳最近再推 3 款全新星座主題飲品，賣相一樣走浮誇路線，但個內心一啲都唔邪惡，飲完都唔怕肥！
早前打頭陣嘅白羊、金牛及雙魚座，分別用咗朱古力、牛奶、大量棉花糖等致肥物堆砌而成，簡直是邪惡軸心！今次新上場的雙子、巨蟹及獅子決定要改邪歸正，用咗奇亞籽mix少許忌廉做 base，加新鮮生果打成嘅沙冰，味道夠 fresh 又夠飽肚，飲完都無罪惡感。
賣相勁 sharp 嘅巨蟹座「Clever Crab Monster」，於奇亞籽上加入以菠菜、薄荷葉、菠蘿汁、香蕉及椰奶打成的沙冰。完全飲唔到有草青味，唔使擔心！沙冰面放上軟曲奇，上面加多件唧滿橙色 butter cream 的牛乳蛋糕，畀啲想像力睇吓，其實係蟹仔個身，再用堆英文「C」字曲奇做蟹拑，係咪好 cute 呢？
雙子座「Gossip Twins Monster」一身粉紅及粉綠亮。沙冰以橙汁、土多啤梨、蜜瓜打成，綴以唇咀及鬍鬚造型的朱古力。最後是有皇者氣質嘅獅子座「Lazy Lion Monster 」，沙冰用上紅豆、豆腐雪糕及牛奶打成，味道跟紅豆雪條有啲似。沙冰面插上加入豆腐雪糕嘅雪糕筒，雪糕表仲沾上爆谷，十足一個獅子頭！3 杯特飲嘅供應日期由即日起至 8 月 15 日，又係時候影相呃 like。
MAMA Burger & Lobster
地址：長沙灣昌華街49號昌暉大廈地下 6 號鋪
電話：3956 5440
營業時間：12nn-12am，逢星期一休息
文：Jessie、攝：Paul
歡迎你 like 我哋 U Food Facebook Page / U Food Instagram ，取得我哋更新更快嘅資訊！
