[試食報告] 君悅 Buffet 重開抵食位！

除咗成個環境靚晒之餘，成個場設有多種不同 style 的座位，好似我地三四個女仔幫襯，最啱做卡座，仲有少少 privacy。

新裝後好多嘢食都係 cooking counter 處理，廚師比例勁多。當然，自助餐控出動前仲可以了解一下新裝後場地的食物分布︰一入門口就是甜品 counter 迎接，中間位置有沙律、燒物，上幾級樓梯則有海鮮冷盤、日本刺身 counter、天婦羅、海南雞飯同熱盤等等，訂位時不妨睇下訂唔訂到喜愛的心水區域。最吸引是新開後價錢不加反減 $60 (現收 $638/位)，食物又優質咗，真心覺得抵！

抵食 1：巨形凍海鮮
龍蝦、大蜆、蟹腳……海鮮無排山倒海般晒冷，反而密密 refill，keep 到新鮮。開半的龍蝦好好肉又鮮甜，蜆肉有成 5 蚊銀大，惟一要挑剔係蟹腳奀咗啲，亦不設生蠔。不過，竟然有 lobster in cocktail saunce 即叫即 mix。冷盤隔離就係日本刺身 counter，款式有甜蝦、帶子、吞拿赤身、三文魚同另一款白身魚等，目測個帶子刺身應該有 2L size，仲有魚生款式不少的魚生飯都好吸引。

抵食 2：驚見白露筍！
行過 counter，竟然見到時令的白露筍原條奉上，仲要係食落清甜無渣、最高級的德國白露筍，真心覺得驚訝！不過，呢啲時令貴嘢唔係長有，食唔食到就要睇彩數。

抵食 3：海南雞任食
好多人都知海南雞不嬲係 Grand Cafe 的名物，依家午市一客都要二百多元，自助餐特別設有海南雞檔，除了可以任食，仲可以揀部位，雞髀位都不用加錢，跟埋一小碗雞油飯、三款醬汁同個雞湯，精緻度不減 a la carte。

抵食 4：即炸天婦羅
在高級日本餐廳享用天婦羅，一啲都唔平，自助餐中「有即」炸天婦羅，更是絕無僅有。天婦羅包括大蝦同各款蔬菜，炸出來的漿薄、唔油仲要好酥化，比得上日本餐廳。

抵食 5：燒海鮮、鵝肝、燒牛肉
同場仲有燒海鮮，包括勁大隻生蠔、蘇格蘭蟶子、帶子等，味道好新鮮。大大件煎鵝肝也絕不手軟，仲晚晚都有燒牛肉供應，用上美國 Prime Grade，肉取回來後自己再熟成，肉味唔算好濃啱我，入口鬆軟。

抵食 6
甜品款式好精緻，差唔多係全西式，有唔少即焗嘢，由廚師幫你取，唔會見到平時俾人畢到爛蓉蓉的核突場面。君悅出名的綠茶紅豆蛋糕當然也在自助餐桌上任取。雪糕自己 homemade，激讚開心果同奶茶味，叫幾球廚師仲會用新地杯載，細心幫你加 topping 同 sauce，成個 present 好靚仔。

再讚︰再要讚的是自助餐枱特設較小的碟同木托盤俾大家放食物，每個碟放一種食物，再一個木盤拎返位，就唔怕一個大碟內不同食物汁醬大兜亂，影響味道。

彈︰自助餐不包飲品，咖啡茶都要另叫。既然都係俾錢另叫，倒不如試下餐廳引入的 craft beer，味道甜香，幾適合女仔。

君悅咖啡廳
地址︰灣仔港灣道 1 號君悅酒店大堂
電話︰2584 7722
自助餐供應時間︰6pm-10pm (午市供散點)
收費︰成人 $638/位，小童半價，設加一

想睇更多？即上 自助餐 特集！

歡迎你 like 我哋 U Food Facebook Page / U Food Instagram ，取得我哋更新更快嘅資訊！