MUJI 有 4 款即沖料理的，包括野菜蕃茄意大利飯、即沖芝士蘑菇意大利飯、即沖雞肉河粉同即沖蝦肉水菜雞湯。今日就先食蕃茄意大利飯、蘑菇意大利飯同個湯。
即沖野菜蕃茄意大利飯 $18
用日本越光米及 5 種穀麥，並加入翠玉瓜、菠菜同蕃茄。蕃茄味道唔算好濃，有少少似早前 hit 過一排嘅「電飯煲煮蕃茄飯」，而意大利飯嘅質地都幾軟腍，食落幾 fresh 唔 heavy。
即沖芝士蘑菇意大利飯 $18
加入帕馬森芝士、豪達芝士，所以一入口就充滿「芝」味。而呢個飯明顯食得出並非求其之作，唔係用蘑菇粒 mix 白汁就咁算，而係有幾塊真‧蘑菇、真‧芝士、真‧蘑菇，小編對呢個飯表示滿意！
試完兩個飯再飲埋湯──蝦肉水菜雞湯（$35 /4 包），以熱水沖開後輕輕拌勻即可。個湯同樣係心思之作，拌勻之後真係有粒粒蝦肉、細細塊嘅水菜，而且湯底充滿「雞」味，頗為濃郁，當然唔及明火煲咁好味，不過喺 office 嚟講算係非常高分。
至於分量方面，可能比較適合「細胃」人士，大食男士就未必夠飽。
溫馨小提示︰
水嘅份量好重要，一個唔小心加多咗水，意大利飯就變意大利粥。同埋最好就搵隻個底深嘅碗/杯，唔係嗰個濃縮料就會整到周圍都係。
試食評分︰
即沖野菜蕃茄意大利飯 7/10
即沖芝士蘑菇意大利飯 8/10
蝦肉水菜雞湯 6/10
歡迎你 like 我哋 U Food Facebook Page / U Food Instagram ，取得我哋更新更快嘅資訊！
