呢位仁兄，叫 Alvin，咪睇佢 gel 晒頭斯斯文文咁，佢係柔道高手嚟，唉‧‧‧‧‧‧差啲離咗題，柔道其實唔係好關事，佢係專業咖啡師嚟，專門研究味道，希望用科學的方法了解味道，有咗呢啲數據，就算唔同咖啡師或者廚師沖咖啡整嘢食，都可以 keep 住穩定水準。佢對飲食太有熱情，無停過考專業資格，佢唔單止有大量咖啡品質鑒定、精品咖啡烘焙師等老本行「沙紙」，佢仲係茶癡，拜於台灣茶藝大師范增平教授門下，考埋國家高級評茶員，最癲係佢一句日文都唔識，夠膽膽粗粗請繙譯去日本考日本米食味鑑定試，但又畀佢滿分做咗「日本米食味鑑定士」，我相信佢應該真係擁有金舌頭，要喺香港搵第二個 Alvin 咁嘅人士，真係難呀。因為太鍾意研究味覺，於是佢呢間咖啡店都中英文名都改咗同「味覺」有關。
講 cert 無謂，佢沖啲咖啡好唔好飲先實際，試下佢嘅 nitro coffee 先，面層的泡超綿密，好神奇㗎，杯咖啡嚟到唔好即刻飲，等佢 30 秒，你會見到啲泡沫慢慢下沉，出現 5 層 layers，飲落 body 滑溜到似牛奶，啲泡仲好幼細，咖啡有果酸香同焦糖香，Alvin 話咖啡除咗加入氮氣，仲有其他 gas mixture，咁先出到 5 種層次，非坊間亂咁打啲氮氣入去就算，飲落先有牛奶咁細滑，又無氮氣陣怪味。
佢仲用呢個方法釀埋擁有 champagne 咁細滑氣泡嘅有汽茶，啲茶葉由台南嚟，記唔記得佢有評茶師資格，佢真係試咗 100 種茶先揀到而家舖頭賣嗰 6 款，安溪黃金桂、玫瑰烏龍等，本來我都懷疑有氣嘅茶掂唔掂，但飲落茶好清香，汽泡唔會好粗好嚡；呢度仲有款勁嘢，茶撈本地手工清啤 = TXB，估唔到飲落似花香啤酒，我呢個茶癡都服鬼咗佢。
飲品之外，我仲喺度食咗一種好爆嘅食品──鹹食嘅 Macaron，parma cheese 蜜瓜、鵝肝、白松露、番茄羅勒及山羊芝士味呀，真係味覺大兜亂啊！
Sensory Zero
地址︰黃竹坑香葉道 2 號 G01 舖
電話︰2511 6011
營業時間︰9am - 7pm
備註：太古城誠品內亦設分店，亦有供應文中食品
歡迎你 like 我哋 U Food Facebook Page / U Food Instagram ，取得我哋更新更快嘅資訊！
