甚至連樣都變埋，將成底雞蛋仔捲起，變成雪糕筒，化身外國大熱的 Puffle cone，加埋雪糕大啖食，的確係雙重享受。再唔係，又可以將雞蛋仔拆散，一粒粒用來 dip 朱古力火鍋，或連埋雪糕，倒 shot Espresso 變成 Affogato！咁搞鬼，之唔係旺角 Eat with me 囉！呢間人氣食店，以雞蛋仔做主題，吸引唔少粉絲捧場，更經常大排長龍。
店主 Polly 原本是做時裝，因自細愛食雞蛋仔，有日忽發奇想，好想開店賣雞蛋仔、雪糕、甜品等自己愛吃的美食。「以前喺尖沙咀返工，日日都去附近雞蛋仔檔幫襯，嗰時已經諗，如果將雞蛋仔同雪糕一齊食，應該好好味。直至朋友講起外國 Puffle cone 大熱，證明我嘅想法真係 work！」她說。
店子裝修型格，一邊係大黑板、另一邊是白色磚牆，配搭不銹鋼吧枱，不像平常賣雞蛋仔的攤檔，反而似間 Coffee Shop。
Polly 對雞蛋仔好講究，雖然基本材料都係糖、雞蛋及麵粉，但堅持用貴價日本麵粉，質感細滑，更分別做出鹹味及甜味的粉漿，唔會款款一樣味。雞蛋仔超多款式，甜味有原味、香蕉味（用真．香蕉做！）、花生醬味、咖啡味等，鹹味則有蒜蓉味、芥末吞拿魚味、粟米味及咖喱味，更不時有新出品。試食過，雞蛋仔質感偏脆，內裏卻綿密鬆軟，有質感，食完唔會一陣風。
而雞蛋仔 x 雪糕的 Puffle cone 選擇亦唔少，以原味雞蛋仔做雪糕筒，雪糕分別用 Dreyer's 及 New Zealand Natural 出品：三重朱古力、士多啤梨、薄荷朱古力、奶油合桃、綠茶味，仲好有心思，按「主題」加裝飾，「Mushroom」有蘑菇蛋白脆餅、「Pink lady」有粉紅色手袋曲奇，「2.55」是模仿名牌包包，早前的聖誕版更有聖誕樹及鹿仔曲奇。
Polly 最新力作有「S'more」，雪糕上放棉花糖，即場用火槍燒，呈半融狀態；「Sweet roses」放上「玫瑰花」，忌廉製作超像真，冧女最啱；「MahJong 食糊」即香港人最愛打的「麻雀」，用朱古力做，可吞埋落肚。
捧住個 Puffle cone，應該點食好？Polly 笑說：「相機食完，不妨先將最頂的香脆雞蛋仔，點吓忌廉食，然後就將雞蛋仔同雪糕大啖咬，享受雙重滋味。」
S'more $48
三重朱古力雪糕，配軟綿半融棉花糖，配搭好有營火會 feel。
Pink Lady $48
士多啤梨雪糕，配以同色系「小手袋」，好 match。
Sweet Roses $48
玫瑰花超像真，花瓣用忌廉逐片整，好有心機，配士多啤梨雪糕，sweet 到暈。
MahJong $48
麻雀朱古力，雀友最啱食！配少見的奶油合桃雪糕，帶焦糖味，食到粒粒合桃。
Egg Waffle Affogato $48
看似跟一般 Affogato 無異，望真啲就見到忌廉、呍呢嗱雪糕外，仲有墊底的原味雞蛋仔粒粒，兩 shot 特濃咖啡更用試管裝住，搞鬼。Polly 教路：「趁雞蛋仔脆身時，不妨將忌廉、雞蛋仔及雪糕一匙舀起，倒咖啡落去食。」食到咁上下，雞蛋仔開始腍，就將咖啡倒晒落杯，連同雞蛋仔、雪糕及忌廉攪勻，當飲雪糕咖啡，爽！
Le-Chocolat $148
朱古力火鍋用比利時朱古力粒炮製，香滑濃稠，輕易將原味雞蛋仔、時令鮮果、棉花糖及 3 球雪糕等沾上朱古力醬，好食！
Oreo With Me $52
將雞蛋仔變成甜品，擺盤靚靚，雞蛋仔粒粒、Oreo 朱古力餅、三重朱古力雪糕及忌廉層層疊，點食好？梗係一啖舀到底食。
Egg Waffle Toast Box $98
將多士盒的中心挖空，麵包粒烘得香脆，淨食都好味，連同雞蛋仔、三球自選雪糕、香蕉片及忌廉等，將多士盒填得滿滿，好澎湃，跟朋友齊齊開心 share。
Eat with me
地址：旺角廣華街 2-20 號翠園大廈 2 座地下 8 號舖
電話：3188 8968
營業時間：12:30pm-10pm
收費：現金及八達通，不設加一
交通：港鐵油麻地站 A2 出口
泊車：廣發商業中心 $28/hr
平均消費：$50
想睇更多？即上 甜品 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
